Shillong, Nohprah 14 : Ka Khasi Students’ Union, West Jaintia Hills District Unit hynne ka sngi Palei, kala iakynduh ia ka Director of Health Services (MI) bad dawa thung noh ia u District Medical Health Officer (DMHO) ba pura ha West Jaintia Hills District namar haduh mynta ym don DMHO hapoh ka District.
Kat kum ka kyrwoh na ka KSU WJHDU kala pyntip, ba ka seng kala sakhi ia ka jingud jingnam jong ki paidbah ka District iaka jingeh kaba ki mad na ka jingbym don u DMHO ha ka District bad haba ki leit sha katei ka ophis, kam ju seisoh bad kam ju poi shaei shaei ruh.
“Ka jingbym don u DMHO ba pura ha ka District kala pyndkoh shibun iaka rukom treikam namar ba une Additional DMHO uba khmih mynta, um don satia ka bor ban shim rai watla la ka dei ka kam kaba rit ruh bad ka seng ka lap ba ka don ka jingdkoh ha ka jingtreikam” la pynpaw ka KSU-WJHDU.
Kila pyntip ba ha ka jingiakren bad ka DHS, kala pynbor ban thung noh mardor ia u DMHO ba pura khnang ba kan pynsuk ia u paidbah jongka thaiñ bad kala kular hakhmat jongki nongialam jongka seng ba katba lah kan shimkhia ban pynsted bad ban leh ia kaba donkam naka bynta ban pynsuk ia u paidbah ka thaiñ.
