AGARTALA, Nohprah 04: Katba ka ilekshon assembly sha ka iingdorbar thawain ka Tripura ka la nang jan, na ka liang ka CPI-M ka la buh ka jingkyrpad ia baroh ki party liang pyrshah ha ka jylla ban iatylli lang kawei ban iakhun pyrshah ia sorkar synshar BJP.
Ka CPI-M ha Tripura ka la khot na ka bynta ka jingiatylli ban pynkhyllem ia ka sorkar ba la lamkhmat da ka BJP ha kane ka assembly ilekshon ka ban wan.
Na ka liang ka CPI-M ka la dawa ruh na u DGP ka Tripura ba un shim ka jingpynshitom pyrshah ia u SDPO u Rahul Das kumjuh ia u Addl SP ka Sepahijala u Randhir Debbarma namar ka jingbym lah ban khanglad halor ka jingshah pyniap jong u Shahid Mia 65 snem rta.
Nalor ka CPI-M, na ka liang ka seng Congress bad ka Trinamool Congress ruh kila pynlong ka jingiakhih pyrshah halor ka jingshah pyniap jong utei u nongkyrshan ka CPI-M wat hapdeng ka jingiadon lang ki bor pulit ha ka lynti surok National Highway hapoh Charilam Bazar ha Sepahijala district kaba la jia ha kane la sngi Balang ba la lah, kata ha ka ppr ba pynlong ia ka prokram sain hima jong ka CPI-M.
Katba ka TMC ka la pynlong ka jingiakhih hakhmat ka iingsah jong u Myntri Rangbah ka jylla, ka Congress ka la thang ia ka dur tyngshop jong u CM ka Tripura bad dawa ia ka jingiehnoh kam ka jong u ha ka sngi Palei ba la lah.
Na ka liang u secretary ka Tripura CPI-M u Jitendra Chowdhury ula ong ba u MLA ka Congress u Sudip Roybarman bad u heh nongialam ka TIPRA MOtha u Pradyot Debbarman kila iakren bad u hadien jong katei ka jingjia ba sngewsih bad pynpaw ka jingsngewkhia kaba jur halor ka jinghiar arsut ha ka jinglong jimgman ha ka jylla.
