Shillong, Nohprah, 04: U Rangbah Shnong ka Nongrah Bah Ban Pyngrope u la pynpaw ia ka jingsngewkhia kaba khraw halor ka jingioh rung jong u Drok ym tang ha Meghalaya, hynrei ha thaiñ Shatei Lam Mihngi baroh kawei.
Haba kren ha ka Awareness cum Health Camp ba la pyllong da ka Seng Samla Lum Marboh, Nongrah ryngkat ka jingiatreilang bad ka Rynjah State Health Dispensary, ha ka sngi Saitjaiñ, u Bah Ban Pyngrope ula ong, ka long kaei kaei kaba isangsot ban iohi ha kito ki por ia ka jylla Mizoram kaba la shah ktah ha u drok bad ka Meghalaya kala mad ia kane ka jingeh mynta.
Une u Rangbah Shnong ula iaroh ia ki samla jong ka Dong Lum Marboh kiba kloi ban wan shakhmat ban kyntiew ia ka bha ka miat jong ka shnong bad ban iada ia ka jingiohrung jong kiwei ki jingsniew ha Nongrah bad ula kyntu ia ki samla ba kin long kiba peitngor namar ka Dong Lum Marboh kadei ka jingkhangbah ia ka Nongrah bad ki kam kiba ym sngewtynnad ki lah sdang na katei ka dong shuwa ba kin ioh ban rung sha kiwei pat ki dong jong ka Nongrah.
U Senior District and Health Medical Officer, u Dr. H. Synmon, uba peit ia ka Rynjah State Health Dispensary, East Khasi Hills u la pynsngew ia ka jingma halor ka jingrung u drok ha Meghalaya.
Kawei na ki longkmie jong ka Dong Lum Marboh, ka Kong Martina Pyngrope kala iathuh ba ki longkmie kila pyrshang ban rat dyngkhong ia ka kyiad hynrei kila iakynduh mawsiang namar ba don ki longkmie kiba die kyiad kiba pyrshah ia katei ka jingthmu.
U Nongaibuit jong ka Seng samla Bah S. Jungai ula iaroh ia ki dkhot jong ka Seng Samla Lum Marboh kiba kloi ban shim ia ka jingkitkhlieh ban iapeit lem ia ka bha ka miat bad ban iatynrong lem ia ki jingeh jong ka dong bad ka shnong hi baroh kawei.
Ha kane ka sngi, la don bun ki longkmie ki longkpa, ki khynnah bad rangbah kiba la wan ban shah sumar bad ioh ruh ia ki dawai bad kane ka sngi, kala long kaba jop da jingiatrei lang jong ki samla ka dong, ki nongtrei jong ka Dispensary kynthup ia ki Asha.
