Shillong, Risaw 11: Ka Regional Committee ka West Khasi Hills, kan shong ia ka jingialang ba nyngkong eh jong ka ha ka 14 tarik mynta u bnai ha Nongstoin ban pynkhreh ia ka wat kaba ar jong ka jingiakren pynbeit pud bad ka Assam.
Ia kane la pyntip da u Chairman ka Regional Committee ka West Khasi Hills Bah Renikton Lyngdoh Tongkhar haba iakren bad ki nongthoh khubor.
U Bah Renikton uba dei ruh u Myntri ka Sorkar Jylla, ula ong “Ngi la dep ban thaw ia ka Committee bad ngi la dep ruh ban thung ia ki briew kum ki dkhot. Mynta ngin shong jingialang jong ka Committee. U Deputy Commissioner ula dep ban pynmih ia ka jingpynbna ia ki briew bala pynrung dkhot ha ka Committee”.
“Ka jingialang la 14 tarik kan dei shuwa tang ka jingialang hapdeng ki Dkhot ka Regional Committee” ula pyntip haba ong ba hadien kane ka jingialang, ka Committee kan sa khot sa ia ka jingialang bad ki Kynhun bapher bapher kynthup ia ki Nongsynshar Shnong, ki Sengbhalang bad kiwei kiwei.
Haba kylli ia ki jingeh ki ban mih, u Bah Renikton ula ong ba ki jingeh kin don beit hynrei ka Committee kala pynkhreh ban tem ia kine ki jingeh.
“Ngin pyrshang kat kaba lah…ngam lah ban kular ba kan nym don ka jingsngew pyrshah. Ngi kwah ba 100% na ki briew kin kmen hynrei ngim thikna ba kan long 100%. Nga kyrmen ba ka Sorkar Assam kan burom ia ka jingkwah jong kito ki shnong kiba kwah ban don ha Meghalaya khamtam ki trai shnong naba ka jingdon ki jaidbynriew ka dei kawei na ki kyndon ba donkam ha ka jingiapynbeit pud”.
