Shillong, Risaw 11: U Symbud Myntri Rangbah ka Jylla Bah Prestone Tynsong, hynne ka sngi ba-ar, ula buh mawnongrim ban kyntiew kyrdan ia ka Tyrsad Sub Centre sha ka Primary Health Centre ha Tyrsad.
Haba kren ha ka jingalang, u Bah Prestone ula ong ba da ka jingkyntiew kyrdan ia kane ka jaka sumar, ki paid nongshongshnong ka Tyrsad bad ki shnong ba marjan kin ioh ia ki lad ai jingsumar kiba kham paka.
U Symbud Myntri Rangbah ula wer ia baroh ki kynhun bad ki nongshongshnong ba kin ai ka jingiatreilang bad ka Sorkar ha kaban leh eiei halor ki kam ka koit ka khiah bad ban pynjanai ia ki jaka ai jingsumar ha ka Jylla.
Ula pyntip ruh ba ka Sorkar Jylla kala kut jingmut ban pynbha noh ia ki jingtei jong ki jaka ai jingsumar da kaba kyntiew kyrdan ia ki.
U Bah Prestone ula iathuh ba ka Sorkar Jylla kala ithuh mynta ia ki Shnong ki thaw ki bym don ia ki jaka ai jingsumar bad ka dang pynkhreh mynta ban leit rah ia ki jaka sumar kum ki Sub-Centre, PHC bad CHC ba kin ai ka jingshakri ia ki paidbah ha ki jaka nongkyndong.
Ha kane ka sngi la iadonlang ruh u MLA ka thain Bah Eugeneson Lyngdoh bad u MDC Bah Lamphrang Blah.
