Shillong, Lber 26: Ka Central Executive Council jong ka Khasi Students’ Union (KSU) kala pyntip ba kan pynlong iaka jingialang jong ka General Executive Council (GEC) ha ka 4 tarik u Ïaiong 2023 ha Jaiaw Shyiap-Lumpyllon Community Hall ka ban sdang ha ka por 12 baje mynsngi.
U General Secretary ka KSU u samla Donald V Thabah ula pynpaw ba ka CEC ka iawer ia baroh ki President bad General Secretary jong ki Unit, Circle, Division, Area bad District Unit jong ka seng kynthup na ka jylla Assam, Mizoram, Delhi, Bengaluru, Mangaluru bad Dehradun ba kin wan iashimbynta ha kane ka jingialang.
Ula ong, ki mat ban ia kren ki kynthup ia ka ilekshon ban jied ia ki nongkitkam ba thymmai jong ka CEC, ban thung ia ki dkhot ka Election Committee bad kiwei kiwei ki mat jong ka seng kiba dang sah.
Ka CEC ka pynbna ruh ba ha kane kajuh ka sngi, kaba dei ka Khasi National Awakening Day, ka kynhun tem Throat Indian Folk Metal kaba ai kyrteng ialade Dymbur kan pynlait ia ka jingrwai ha ryngkat ka jingringdur da kaba shu dro kaba la ai nam ia ka jingialeh u Pa’iem Tirot Sing Syiem bad ka jingrwai ka kyrteng ‘U Tirot Sing’.
Ia kane ka jingrwai yn pynlait ha kane kajuh hi ka jaka ha ka por 5 baje janmiet bad yn die ruh ia ki T-shirt kiba ia dei bad kane ka jingrwai.
Pule lang ia kane: Kem ki Pulit ia u Nongkhaii droks, kurup drok ba 125 gram
