Shillong, Naitung 18 : U Myntri Rangbah ka Jylla Conrad K Sangma, ula khot iakren ia ki nongialam ka Khasi Students’ Union (KSU), namar ka kam khynra mynder kaba la iaid ha kylleng ki jaka ka Ri-lum Khasi Jaintia.
Kat kum ka shithi khot iakren, la ong ba u CM u kwah iakynduh ia ki nongialam ka KSU ha ka 19 tarik Naitung ha ka por 12 baje mynsngi, hapoh ka Ophis treikam jong u ha Secretariat.
Ka Deputy Commissioner ka East Khasi Hills kala phah da ka shithi sha u General Secretary ka KSU samla Donald Thabah ba pyntip ia kane ka jingkhot iakren u CM.
Dang ha kine ki khyndiat sngi, ka KSU kala pynieng haduh 3 tylli ki khyrdop Inner Line Permit (ILP) ha Jylla-kawei ka Pahammawlein, Ri-Bhoi, kawei ha Umstain, East Jaintia Hills bad kawei ka Athiabari, West Khasi Hills.
Ia kine ki khyrdop ILP la pynieng ban tynjuh ia ka jingkuman ka Sorkar ha kaban buddien ia ka jingdawa pyntreikam ia ka Inner Line Permit (ILP) bad ka Sorkar Pdeng nalor ban pyntreikam ia ka Meghalaya Residents Safety & Security Act.
Nalor kine ki khyrdop, ka KSU kala pynlong ruh ia ki jingtalasi Labour Licence bad Work Permit ia ki nongbylla bar Jylla ha kylleng ki jaka.
U President ka KSU samla Lambokstar Marngar, ha ka sngi Balang, ula pyntip ba tang ha kine ki 12 sngi bala leit noh, ka KSU kala beh krad ia palat 2500 ngut ki nongbylla bar jylla kiba la wan trei bylla khlem ki kot ki sla sha Jylla.
U Myntri Rangbah ka Jylla dang shen, ula ong ba ki sengbhalang kim don bor ban khynra Work Permit haba pyntip ruh ba “Ym don Work Permit” satia hapoh ka Jylla.
