Guwahati, Nailar 24 : U Symbud Myntri Rangbah (Dy.CM) ka Delhi, u Manish Sisoda ula shah khot hajir ha ka kashari ha ka nongbah Guwahati, Assam ha kaba iadei bad ka mukotduma pynbudnam.
Ka kashari jong u chief judicial magistrate (CJM), Kamrup ha Guwahati, Assam ka la kyntu ia u Manish Sisoda ba u dei ban wan mih hakhmat jong ka ha ka 29 tarik u Nailur u ban wan.
Ia katei ka mukotduma pynbudnam pyrshah ia u Dy. CM ka Delhi, u Manish Sisoda la ujor da u Myntri Rangbah (CM) ka Assam, u Himanta Biswa Sarma.
U CM ka Assam ula ujor da ka mukotduma kam bymman pyrshah ia u Sisoda halor ki jingkynnoh kiba pyniasoh ia ka kurim jong u Himanta ka Riniki Bhuyan Sarma ha kaba iadei bad ki kam bamsap.
Nalor kata, na ka liang ka kurim jong u CM ka Assam ruh ka la ujor da ka mukotduma pynbudnam kaba T.100 klur pyrshah ia u Sisoda hapoh ka kashari ha Assam.
Ha ka snem 2020, kata ha ka por ba ka jingpang Covid-19 ka dang trei borbah ha baroh ki bynta jong ka ri India, u Himanta Biswa Sarma u dang bat kum u Myntri ka tnat ka koit ka khiah ka sorkar Assam.
Ha ka 4 tarik u Jylliew, u Sisoda ula ong, “U Himanta Biswa Sarma ula ai kontrak sha ka kompeni ka kurim jong u.U la siew T.990 na ka bynta kawei ka PPE kits, katba kiwei pat kila thied ha ka dor T.600 kawei na kiwei pat ki kompeni ha kajuh ka sngi.Kane ka dei ka kam bymman ba shyrkhei.”
U Sisoda ula kam ruh ba u don ia ki kot ki sla ban pynshisha halor kane.Watla katta baroh arngut, kata na ka liang u Sarma bad ka kurim jong u kila kyntait ia baroh kine ki jingkynnoh pyrshah ia ki.
Na ka liang u Sarma ula jubab ruh halor kine ki jingkynnoh jong u Sisoda da kaba ong ba ka kurim jong u kala noh synniang mon sngewbha ia ki PPE kits khlem da donkam ban siewdor sha ka sorkar.
