Guwahati, Nailar 08 :Ka tnat CID jong ki pulit ka West Bengal, ka la khot hajir ia u nongkhaii u ba dei na Assam halor ka jingtohkit ka ba iadei bad ka jingioh kurup pisa na ki laingut ki MLA ba la shah kem jong ka seng Congress na Jharkhand.
Katkum ki khubor la iathuh ba ka tnat CID ka West Bengal ka la phah ia ka jingthoh ka ba iadei bad ka jingkhot hajir shapoh ka iingsah jong u Dhanuka ha Guwahati.
Kane ka tnat tohkit ka la kyntu ruh ia u Ashok Kumar Dhanuka ba u dei ban wan mih hakhmat ka kynhun tohkit ha Kolkata mynta ka sngi Nyngkong.
Laingut ki MLA ka Congress na Jharkhand, u Irfan Ansari, u Rajesh Kachchap bad u Naman Bixal Kongari ki la shah kem noh ha ki bor pulit ka West Bengal ha ka 31 tarik u Naitung ba la lah na Howrah.
Ki pulit ki la ioh ruh ban kurup ia ka pisa ka ba haduh kumba T.50 lak na ka kali SUV ba la pyndonkam da kine ki MLA ka Congress na Jharkhand.Ka tnat CID ka West Bengal ka la shimti ia ka jingtohkit halor kane ka jingjia na ki bor pulit ka Howrah.
Lah ban kdew ba u MLA ka Congress na Jharkhand u la ujor pyrshah ia u Myntri Rangbah (CM) ka Assam, u Himanta Biswa Sarma halor katei ka jingioh kurup ia ka pisa na kitei ki laingut ki MLA jong ka seng na Bengal.
U MLA ka Congress na Bermo, u Kumar Jaimangal Singh ha ka shithi ujor pyrshah ia u Sarma hapoh Argora police station ha Ranchi u la kynnoh ba kine ki briew jong u ki ba la shah kem noh na Bengal ki la kyntu ia u na ka bynta ban leit iakynduh ia u CM ka Assam ha Guwahati ha ryngkat bad ki.
U Singh u la kynnoh ruh ba u la dei ban shah kular ban ioh ia ka shuki myntri nalor ka pisa ka ba da ki klur lada ki la lah ban pynkhyllem ia ka sorkar synrop JMM-Congress hapoh Jharkhand.
