Guwahati, Risaw 11: Kawei ka hati kynthei ha ryngkat i khun jong ka kila khlad noh hadien ba kila shah jynrat ha ka rel Rajdhani Express kaba pynher sted hajan Kharikatia railway station hapoh Jorhat district ka Assam.
Kane ka jingjia kala wan jia hadien ba ka kynhun jong ki hati ki dang jam lyngba ia ka lynti rel ha kane ka miet sngi U Blei ba la lah.Katkum ki heh sorkar la ong ba katei ka hati kmie ka dei kaba la don 22 snem rta bad i khun jong ka iba dang 10 bnai.
“Na ka liang ka tnat forest kala pyntip sha ki heh ka tnat railway ha kaba iadei bad ka jingdon jong ki hati khlaw kiba iaid lyngba bad kyrpad ia ki ba kin pynthikna ba ki rel kin pynduna ia ka jingher sted katba ki dang iaid lyngba na katei ka jaka.Hynrei kim shym la leh ia kane,” ong u district forest officer ka Jorhat, u Biken Pegu.
“Kawei ka kmie hati lem bad i khun jong ka kila duh ei la ka jingim.Ngin pynlong ia ka jingtohkit bad shim ka jingpynshitom katkum ka ain,” ong shuh shuh u Pegu.
Ha ka sngi Balang ba la lah, uwei u heh khlaw bala san bha ula khlad noh hadien ba ula shah bat ha ka bording ilektrik ha ki bynta jong ka khlaw hapoh Sanfan forest range ha ka sor rit Gossaigaon hapoh Kokrajhar district ka Assam.
Kane ka jingjia kala wan jia hadien ba ka kynhun jong ki hati khlaw kila mih shabar ki jaka khlaw na ka bynta ban wad bam.
Uwei pat u hati khlaw ula khlad noh hadien ba ula shah bat ha ka bording ilektrik hapoh Kamrup district ka Assam ha kine ki khyndiat taiew ba la lah.
