Shillong, Nohprah 15: Ka Deputy Commissioner ka East Khasi Hills ha ka sngi Palei, kala pynmih ia ka hukum ba khang pyrshah ia kano kano ka jinglum pisa beain na ki nongkhaii bad ki dukan hapoh ka District.
Kala bthah ruh ia baroh ki trai dukan ba kin pyndait noh ia ki kor CCTV hapoh ki dukan jong ki.
“Khnang ban lah tehlakam ia kane ka kam beain, la khang ia baroh ki kam lum pisa beain na ki dukan bad kiwei kiwei ki jaka treikam bad ka ain kan trei tyngeh halor kino kino ki jingtip lane ka jingiohbat ia kane ka kam beain” ong ka Deputy Commissioner RM Kurbah ha ka hukum.
“La bthah ia ki nongshong dukan ba kin pyndait noh ia ki kor CCTV ha la ki jong ki dukan bad buh ruh ha ka jaka kaba biang bha na ka bynta ban pynthukna iaka jingshngain bad jingiada bad ruh ban ioh ring ia kino kino ki kam beain ha ki dukan jong ki” ong ka hukum.
Kala ong ba kila don ki jingud halor ka jingwan lum pisa beain na ki dukan bad kiwei ki jaka treikam ha ka kyrteng jong ka noh synniang lane ai shithi dawa pisa kaba la ktah jur ia ki trai jong kine ki dukan bad ruh wanrah ia ka jingsyier ia ki riew paidbah.
Ka hukum ka ong ba kino kino ki jinglum pisa ha baroh kawei ka District ki bym pat ioh jingbit n aka Ophis ka Deputy Commissioner ka East Khasi Hills Shillong lane da kino kino ki bor Sorkar, la khein ia ki kum ki kam bymman.
