Shillong, Nailur 26 : Ka Federation of Khasi Jaintia & Garo People (FKJGP) kala khang khyrdep ia bun tylli ki dukan jong ki bar Jylla, kiba treikam bad khaii be-ain khlem ki kot ki sla ba donkam na ki bor badei khmih, kiba don ha ka thain Keating Road.
Ka FKJGP kala pynlong ia ka jingkhynra ba kyndit hynne ka step sngi Ba-ar ia ki dukan bar Jylla ha Keating Road bad shem ba bun bah ki dukan kila plie bad treikam khlem ka Trading Licence bad Labour Licence. Ia kane ka jingkhynra la pynlong da ka FKJGP Malki Circle ha ryngkat ka jingiadonlang ki Nongialam na ka Sengkmie bad ki Nongtrei ka Shillong Municipal Board (SMB).
Kane ka jingkhynra kala sdang naduh ka por mynstep bad kiba bun ki dukan kiba shah khang khyrdep ki dei ki dukan die tiar kali bad ki karkhana shna kali.
Ka Seng kala ai ka jingmaham kaba tyngeh haba ban jur ba ka seng kan ym ailad ban don ki dukan ne ka jingleh business ki bar jylla khlem da shim ia ki jingbit bad don ia ki kot ki sla kiba biang ba ioh na ki bor khmih.
Hynrei, kane ka jingkhynra ka FKJGP kala shah pynsangeh noh da ka jingwan tuklar jong ka Tnad Pulit. Ki bor Pulit kila kyrpad ia ki Nongialam ka FKJGP ba kin kiar na ka jingkhang khyrdep jubor ia ki dukan haba kdew ba ka seng ka khlem ioh jingtip na ki bor khmih ban leh ia kane nalor ba kila pyntip ruh sha ka Dorbar Shnong.
Hapdeng kane, kala mih ka jingiania kaba jur hapdeng ki Nongialam ka FKJGP bad ki Pulit hynrei da ka jingtuklar jong ki Nongtrei ka SMB kiba la pyni ia ki kot ki sla ban khynra, ki Pulit kila ailad ia ka jingkhynra ba kan bteng hynrei kila khang pat ban khang khyrdep ia ki dukan.
Ha ka jingtohkit, ka FKJGP kala shem ba bun ki nongbylla bar Jylla ha ka thain kim shym la aplai ne don ia ki labour licence bad bun ruh ki dei kiba la trei la bun bun snem khlem ki kot ki slab a donkam.
Nalor kane, la shem ruh ba bun ki dukan ba pyniaid da ki bor jylla kim shym la pynthymmai ia ki Trading Licence naduh u snem 2010 bad kane ka pyni ba kila plie ia ki dukan khlem ka licence haduh mynta.
U Bah Wirfortis Lyngdoh Mawphlang President ka FKJGP Malki bad u Organising Secretary ka FKJGP sengkmie, ula ong, ba ka jingpynlong ia kane ka jingkhynra kadei hadien ba ka seng ka la ioh pdiang ia ki jingujor ba bun ki bar jylla kim shym la don iaki kot ki sla ban khaii pateng ne kiban pynthymmai ia ki kot khaii pateng ha ka ophis jong ka SMB.
U Khrawkupar Nongsiej Organising Secretary ka FKJGP, ula iathuh ba ha kane ka jingkhynra la shem ba bun ki bar jylla kim shym la pynthymmai ia ki kot ki sla bad bun ki dukan kila khang khyrdep lut haba ioh jingtip ba ka don ka jingkhynra.
Ula pynpaw ia ka jingbynniaw, ba kitei ki dukan kim ju pynthymmai ia ki kot ki sla la bun snem bad ka SMB ka dei ban pynlong ia ka jingkhynra man la ka por.
“Baroh shi katta la ju iohsngew ba ka Municipal ka ju ud ba kam ju don pisa, kumta kadei ban pynlong ia ka jingkhynra ha kylleng ki jaka bad kan lah ban pynmih ia ka khajna khamtam haba bun ki bar jylla kim ju pynthymmai ia ki kot ki sla” ong u Bah Nongsiej.
Ula ong ruh ba ka seng kan sa leit ban iakynduh ia u Chief Executive Officer ka SMB ban phah khynra ia ki dukan jong ki bar jylla kiba don ha ki jaka kiba hap ha ka jongkhmih jong ka Municipal bad ban jurip lang ruh ia ka jingkyntur pud ia ki jaka ki puta da ki bar jylla.
