Shillong, Iaiong 11 : Ka Khasi Hills Autonomous District Council (KHADC) ha ka jingpynbna ba pynmih ha ka 4 tarik Iaiong, kala khang ia ki Rangbah Shnong, ki Myntri bad ki Sordar Shnong ban iadon bynta ha ki kam sain pyrthei bad don bynta ruh bad ki seng sain pyrthei.
Kat kum kane ka jingpynbna bala soi da u Secretary ka EC, la pyntip ba ka Executive Committee kaba shong jingialang ha ka 15 tarik Lber kala rai ba “Ki Rangbah Shnong, Myntri Shnong bad Sordar Shnong, Matabor, kim dei ban iadon bynta bad kino kino ki seng sain pyrthei lane ki kynhun kiba iadonbynta ha ka kam sain pyrthei lane iarap ha kano kano ka bynta bad ki kam sain hima sima”.
“Baroh ki Khlieh Nongsynshar kata ki Rangbah Shnong, Myntri Shnong, Sordar Shnong, Matabor, ki dei ban ioh ia ki Sanad na ki Khlieh Nongsynshar jong ki Hima kat kum ki Ain, ki Rule jong ki Hima/Elaka. Kano kano kaba long pyrshah ia kane yn khein beain bad ka ba iap” kala bynrap.
Ka KHADC kala pynbna ba kino kino ki Nongmihkhmat ha ka jaka jong ki Dorbar Shnong shuwa ba kin ai ia ki “Residential Certificate” sha ki Nongshongshnong, ki dei ban da pynthikna shuwa ia ka jinglong jingman jong kine ki Nongshongshnong kat kum ka Ain, Rules jong ka Hima/Elaka.
Nalor kane, ka KHADC kala bthah ia ba “Ki Rangbah Shnong, Myntri Shnong, Sordar Shnong, Matatir ki dei ban ai Residential Certificate sha ki paid Khasi kat kum ka Khasi Hills Autonomous District (Khasi Lineage) Act, 1997 bad ki Rule jong ka. Nalor kata, ym dei ban ai ia kano kano ka Residential Certificate ia kiba kylla ia ka Kur/Jait lane ba shim ia ka Kur/Jait jong kiwei khlem da iaid kat kum ka kyndon 3 bad kyndon 12 jong ka Ain bala kdew haneng”.
