Shillong, Jylliew 16: Ka bor District jong ka East Jaiñtia Hills, kala hukum ban khang noh shuwa ia ka jingiaid ki kali na ka National Highway-06 namar ka jingtwa khyndew ba ishyrkhei ha ki 6-7 tylli ki jaka, kaba jia na ka jingther u slap uba la neh mynta la palat shitaiew.
Ka jingtwa khyndew kaba jur eh kala jia hynnin ka sngi Balang ha ka surok hapdeng ka shnong Nongsning haduh Ratacherra bad la pyntip ruh ba hynne ka step pat sa ka surok ba marjan ka Toll gate plaza ha Lumshnong, kala twa ma ka jingther palat u slap.
Kawei ka kali saw shaka kala hap jraiñ sha thliew jong ka surok National Highway ba twa ha ki thaiñ Brishyrnot bad shah ban ha kawei ka trok hynriew shaka kaba hap nadien.
U Deputy Commissioner ka District u Abhilash Banarwal ula ong “ Ngi la khang ban iaid ia ki kali na kane ka surok namar ngim kwah ban don kano kano ka jingjia ba sngewsih khamtam ka jingduh ia ki mynsiem briew”.
Une u Heh Ophisar u pyntip b aula pynmih ruh ia ka jingbthah ia ki kali ba kin kiar na ka jingiaid lynti na kane ka surok katba ka jinglong jingman kam pat I shngaiñ bad ong “Kito kiba donkam ban iaid na ki kam ba kyrkieh (Emergency) la bthah ba kin sa phikir bha ialade “.
U Superintendent of Police ka East Jaiñtia Hills u Jagpal Singh Dhonoa ba haduh mynta ym pat shym la ioh khubor ia ka jingduh ki mynsiem briew na kine ki jingjia twa khyndew bad iathuh ba na ka liang ka jong u, ula phah ia ki Pulit ba kin leit sha kine ki jaka ba twa ban nym shah shuh ia ki kali ba kin iaid lyngba na ki surok kiba la ngam katba kam pat sangeh ka jingslap.
Da ki spah tylli ki kali kiba sahkut mar shiliang ha kine ki jaka ba twa ka surok bad na ka liang ki bor district kila pyrshang ban ai jingiarap ia ki briew ba sahkut da ki jingbam bad ka um.
