Shillong, Naiwieng 04 : Ka Deputy Commissioner ka East Khasi Hills Kong RM Kurbah, ha ka sngi Thohdieng, kala pynjari da ka kynhun 144 CRPC ba khang ia ki kali heh ba khia palat 15 MT ba kin hiar na Shillong bad iaid lyngba ka Jingkieng Damsite, Umiam.
Kane ka hukum kala mih haba pyntreikam ia ka hukum jong ka Tnad Bording ka Jylla kaba pynmih ha ka 1 tarik Naiwieng, ba bthah ban pyrrkhing kyndon ia ka jingiaid ki kali nalor ka jingkieng Damsite, Umiam.
Kane ka hukum ka Tnad Bording, kala mih na ka Under Secretary ka Tnad Power Kong Josephine Nongbet, kaba la phah sha ka Deputy Commissioner ka East Khasi Hills Kong RM Kurbah ba kan pyntreikam.
Kane ka Heh Ophsiar ka Tnad Power, kala pyntip ba ka kaiphod halor ka Safety Audit jong kane ka Jingkieng pyllait um ka Umiam bala ioh na ka IIT, Guwahati, la ai jingmut ba ym dei shuh ban shah iaid ia ki kali heh na kane ka jingkieng kat bym pat lah shna bha ia ki girder beam bad ka deck slab.
Ka kaiphod kala buh ruh ia u pud ba ka jingkit ba khia, ka ba lah ban shah iaid na kane ka jingkieng ka dei ban long tang hapoh ka 15 MT.
Ka Deputy Commissioner kala khang ba ym dei shuh ban shah ia ki kali heh ba khia palat 15 MT ba kin hiar na Shillong sha jingkieng Damsite, Umiam hynrei kine ki kali ki hap ban iaid noh sha Shillong By-Pass lyngba ka Mawryngkneng.
