Shillong, Naiwieng 04: Ka khun jong kawei ka longkmie kaba shah dung da ka tari hala u kurim, kala kynnoh ba ki Pulit kila pyrshang ban pynkohnguh ia ka, ba kan ym pyniaid shuh shakhmat ia ka case pyrshah ia u Kpa tang namar ba u dei u Director ka Shillong Golf Club.
Haba kren sha ki lad pathai khubor, Kane ka khun (ka bym kwah pynpaw kyrteng), kala pyntip ba kane ka jingjia kala jia ha ka step jong ka 31 tarik Risaw haba ka Kmie kala pan pisa na u Kpa ban thied ia ki marbam ha Iing.
Kane ka Khun kala kynnoh ba ki Pulit ka Laban Police Station kim pat shym la kem satia ia une u briew ia uba la dep ujor ejahar, uba kyrteng u Suresh Singh tang namar ba u dei u Director ka Shillong Golf Club.
Kala ong ba ka jingbym leh eiei ki Pulit ia u Kpa jong ka, ka pyni ba ka don ka jingiadei kam bad ki heh ki hain.
Kala iathuh ba ki Pulit hadien bala ioh pdiang iaka ejahar kila pyngat Case pyrshah ia u kpa hynrei kila pyngat Case ha ki kyndon ki bym don ne iahap katkum ka ejahar bad kila pyrshang ruh ban kyntu iaka ban nym pyniaid shakhmat iaka Case ba dung tari.
“U Kpa jong nga ula sdang ban shoh ia ka kmie jong nga naduh ba iathoh bad ngam kwah ba kane ka Case ba dung tari kan shu jah kum kiwei ki Case” kala ong.
