Shillong, Jymmang 15 : Ka kynhun ki Sengbhalang bad ki nongniah kali kamai, kila khang dam ia ka jingtreikam jong ka Toll Plaza ka National Highway Authority of India kaba don ha surok National Highway-6 ha Pasyih, West Jaintia Hills District.
Kane ka jingkhang dam kala jia hadien ka jingialang paidbah bala lamkhmat da ki kynhun Sengbhalang ba kynthup ia ka Jaintia National Council (JNC), ka PSM, ka Hynniewtrep Youth Council (HYC bad ki synjuk ki seng ki kali kamai ka East bad West Jaintia Hills.
Ia kane ka jingialang paidbah la pynlong da ka jingthmu ban pynpaw ia ka jingpyrshah halor ka jinglum khajna jong ka Toll Plaza ia ki kali kiba don ia u registration nombor ML-04 bad ML-11.
Dang shen u President ka Jaintia National Council (JNC) Western Zone Bah Ha.ehi Bamon ula shah khot hajir ha ki Pulit ka Phramer Traffic Cell halor ka ejahar bala mudui ia ka jingleit iakhih hakhmat ka Toll Plaza kaba la pynthut ia ka leit ka wan jong ki kali bad ka jingtreikam jong ka Toll Plaza.
Ka JNC kala khang pyrshah ia ka jinglum khajna ia ki kali kiba don u registration numbor ML04 bad ML-11 halor ka nongrim ba kine ki kali ki dei jong ki trai shnong ka thain.
Kat kum ka jingpynbna ba pynmih da u Deputy Commissioner ha ka 7 tarik Lber, 2026, la pynlait ia ka khajna na kane ka Toll Plaza tang ia ki kali ML-04 kiba dei na ki phra tylli ki shnong kiba don marjan ka Toll Plaza-ka Ialong, Pasyih, Phramer, Sabah Mutwang, Muthlong, Mookaswan, Nangbah bad Mihmyntdu.
Namar ka jingbym pynsngap ki bor pyniaid ka Toll Plaza, ka JNC kala lum ia ka jingialang paidbah bad hadien la pynbud da ka jingiatur paidbah sha kane ka Toll Plaza ban khang tala ia ka Ophis.
Na ka liang jong u MDC ka JHADC ba na Saphai-Sahsniang bah Rikut Parein, ula ai ia ka jingkyrshan halor ka jingdawa jong ka JNC.
Hadien kane ka jingkhang dam, ki bor pyniaid ka Toll Plaza pyndem bad kila mynjur ban pyntreikam ia ka jingdawa ban pynlait noh ia ka jingsiew khajna ia baroh ki kali kiba dei na ri-lum Jaintia.
