Shillong, Lber 19 : Ki Pulit ka Jylla, kila ioh kem ia u briew uba suba donkti hakhmat eh (main suspect) ha ka jingpynbthei bomb IED ha Them Metor, kaba jia ha ka miet 9 tarik Lber.
Ia une u briew la ioh kem hynnin ka sngi Nyngkong ka 18 tarik Lber, da ka jingiatreilang hapdeng ki Pulit ka East Khasi Hills, ki Pulit ka Ri-Bhoi bad ka Mairang, Eastern West Khasi Hills District.
U Superintendent of Police ka East Khasi Hills Rituraj Ravi, ula ong ba une u briew u dei uba don ka jingiadei bad iajan bha bad ki dkhot ka seng Hynniewtrep National Liberation Council (HNLC).
U iathuh ba une u briew u kyrteng u Namphyrnai Lyngdoh Peinlang ba 21 snem ka rta, uba dei na ka shnong Peinlang. La kem ia u na Mairang bad la wankit noh ia u sha Shillong ban pynlong ia ka jingtohkit.
Lah ban kdew hangne, ki Pulit kila ioh ban kem haduh 7 ngut ki briew kiba donkti ha kane ka jingpynbthei bomb IED ha Them Metor ba kynthup ia u Nongialam ka seng HNYF Tarson Lymba bala kem na Dawki.
Haduh saw ngut la ioh ban kem na ka thain Umsning bad Nongpoh, Ri-Bhoi District bad ioh ruh ban kurup ia bun bah u bomb IED bad ki tiar shna bomb.
Da kane ka jingiohkem, ki Pulit kila iohksai ba kine ki briew ki thmu ban pynbthei bomb IED biang ha Nongbah Shillong bad ha Nongpoh.
Ha kawei ka liang, u SP u la iathuh ba ka tnat Pulit ka la pynkhlain bha ia ki bor pahara ha nongbah Shillong bad kumjuh ha baroh kawei ka district ban iada na ki jingjia ba ktah ia ka suk ka sain.
