Shillong Lber 19: U Shaibor Nongrum ula pynjop ia ka Nangkiew Irat SC da kaba thep 2 kol ha ka jingiakhun pyrshah iaka Sawmer SC ha ka Shillong Premier League 2023 ha SSA Stadium First Ground, Polo hynne ka sngi.
U Shaibor ula ioh thep ia ka kol kaba nyngkong ha ka minit kaba 62 bad ia ka kol ka baar ha ka minit kaba 83 katba u Diego Khriam jong ka Sawmer uba la mih hadien ula ioh thep shi kol ha ka minit kaba 70.
Baroh ar tylli ki kynhun kila ioh ia ki kabu ha ka kylla step hynrei kim shym la pat ban thep kol, u Banshanlang Nongdhar jong ka Nangkiew ula ioh ia ka lad ha ka minit kaba 23 hynrei ka bol kaba ula shut kala leit sharud bad tang hadien ar minit u M Nikhil Raj ula shu jam ia ka bol hynrei u rangap kol ka Sawmer u Pyrshangbanbha Dkhar ula ioh ban iada ba ka bol kan rung shapoh kol.
U Nikhil ula iohlad biang ha ka minit kaba 34 hynrei ka bol kaba ula shut kala dei beit ia u diengkol.
U Gamelial Kharlyngdoh jong ka Sawmer ha shwa ban kut ka kylla step ula ioh ia ka kabu hynrei ka bol kaba ula shut kala lait sharud.
Ka jingiakhun lashai ka sngi ha ka SPL 2023 kan long hapdeng ka Shillong Lajong FC pyrshah ia ka Langsning FC ha ka por 3 baje mynsngi.
