Shillong Lber 19: Ka National Cricket Academy jong ka BCCI kala jied ia ki 4 ngut ki nongialehkai Cricket na ka jylla Meghalaya ban iashimbynta ha ka North East Senior Women’s Camp ka ban sdang naduh ka 22 u Iaiong haduh ka 16 tarik u Jymmang ha Rangpo, Sikkim.
Kine ki saw ngut ki kynthei kiba la shah jied ki kynthup ia ka Debasmita Dutta, Ajima Sangma, Luiza Tamang bad ka Monica Lyngdoh Phawa.
Kitei ki 4 ngut kin leit ban iashimbynta lang ha katei ka Camp ryngkat bad ki nongialehkai na ki 5 tylli ki jylla kiba hap ha ka North East Zone kaba kynthup ia ka Sikkim, Manipur, Mizoram, Nagaland bad Arunachal Pradesh.
La jied ia ki nongialehkai da kaba pynshong nongrim ia ka rukom ialehkai bha ka jongki ha ka lympung iakob jongka BCCI ha u 2023-2024 kaba kynthup ia ka Senior Women’s T20 Trophy ha u bnai Risaw 2023 bad ka Senior Women’s One Day Trophy kaba la long ha Kyllalyngkot mynta u snem.
