Guwahati, Lber 19: Katkum ka kaiphod kaba la pynmih da ka ‘World Air Quality Report 2023,’ ka nongbah Guwahati kala wan ha ka kyrdan kaba ar kum ka nongbah kaba jaboh tam ka lyer ha ka pyrthei.
Ha ka kaiphod kaba la pynmih da ka Swiss Air Quality Monitoring Body, IQAir, kala pynpaw ia ka jingsngewkhia halor ka jingjaboh jong ka lyer ha ki nongbah kiba don ha kylleng kane ka pyrthei.
Lah ban kdew ba ha katei ka kaiphod la kdew ba kala don ka jingkiew ha ka jingjaboh ka lyer ha kylleng ki nongbah jong ka ri India. Ka Begusarai, kaba dei ka nongbah jong ka Bihar, kadei ka nongbah kaba jaboh tam ka lyer bad la bud hadien ka jongka da ka nongbah Guwahati.
Ka long kaba sngew shyrkhei ba ka PM2.5 jongka Guwahati kala kiew ar shah na ka 51 sha ka 105.4 Micrograms Per Cubic Meter hapdeng jong u snem 2022 bad 2023.
Ka kaiphod kala kdew ruh iaka jinglong jingman ha ka ri India ba ka la wan balai kum ka ri kaba jaboh tam ha ka pyrthei ha u snem 2023, kaba bud hadien jong ka ri Bangladesh bad Pakistan. Kane ka pyni iaka jingkiew kynsan na ki snem kiba la dep. Ki jingtip na ka bynta ban pynmih ia ka kaiphod la leh da kaba lum ia ki jingtip na palat 30,000 tylli ki Air Quality Monitoring Station kiba don ha kylleng kane ka pyrthei.
