Shillong, Nailar 19: Ki Pulit ka West Khasi Hills, kila kem noh ia u trai jong ka par dewiong kaba twa hynne ka step phyrngap ha Urak (Riangdim), West Khasi Hills, kaba lam sha ka jingiap jong uwei u nongtrei par bad uwei pat hapdeng ka jingmynsaw kaba jur.
Ia kane la pyntip da u Superintendent of Police ka West Khasi Hills Bah Herbert G Lyngdoh uba iathuh ba ia une u trai par la tip kyrteng u Hubath R Sangma ba na Shallang.
Une u Heh Pulit u pyntip ba ki Pulit haba ioh jingtip ia kane ka jingtwa par, u Deputy Superintendent of Police Bah B Kharjana bad ka ki Ophisar na Shallang Police Station, kila hiar ban tohkit ia kane ka jingjia bad shem ba arngut ki briew kila leit tih dewiong na kane ka par hynne ka step por por 5-6 baje eiei halor ka jingbthah jong u trai ka par.
Kine ki arngut ki briew ki dei u Lependro Sangma ba 34 sdnem bad u Hendid Momin ba 33 snem kiba dei na ka shnong Uguri kaba hap ha Kharkutta Police Station, North Garo Hills.
U Lependro ula iap ha kane ka jingtwa ka par katba u Hendit ula mynsaw jur. Ia ka metiap u Lependro la kit noh sha Shallang PHC ban pyndep ia ka post mortem bad kumjuh ruh ia uba mynsaw ba un ioh ia ka jingsumar.
U Superintendent of Police u pyntip ba halor kane ka jingshem, u Sub Inspector bad OC ka Shallang ula ujor da ka ejahar halor kane ka jingia bad la register case ia ka hapoh ka kyndon 188/304A IPC pule lang bad ka kyndon 21 (1) MMDR Act.
“Ki pulit kila kem ia u trai ka par u Hubath R Sangma bad hadien ka jingtohkit kaba bniah, yn sa phah noh ia u sha ka Judicial Custody” ong une u Heh Pulit.
U Bah Lyngdoh u pyntip ruh ba na kane ka jaka, ki Pulit kila ioh ruh ban kurup haduh 7-8 ton u dewiong, 2 tylli ki thela ba pyndonkam ban kit ia u dewiong na krem sha ka depot, 2 tylli ki borsha bad 2 tylli ki shniah.
Une u Heh Pulit u la ong ba kane ka par dewiong ka dei kaba don sha ka jaka ba long khlaw bha ha Urak bad kaba lah ban poi tang da kaba iaid kjat haduh 2 kynta eiei.
Ka jingjngai na Shallang Police Station sha Urak ka long kumba 25 Km kata 2 kynta haba iaid kjat nalor ka 1 kynta ba iaid da ka kali.
