Shillong, Lber 28 : Ki Pulit ka Ri-lum Garo, kila kem ia u Area Commander barim jong ka kynhun kiengatiar Garo National Liberation Army (GNLA) ha ka sngi Thohdieng namar ka jingdonkti ban siat iap ia u nonghikai skul ha North Garo Hills District ha u snem 2012.
“Ia une u Nongialam ka GNLA ba kyrteng u Laben Ch Sangma ba ju khot sin u Chenang, uba bat kumu Area Commander ka GNLA Northern Zone, la lem halor ka jingsiat iap ia u Dennybirth G Momin, uba dei u nonghikai science bad math jong ka Resubelpara Higher Secondary School. Ia une u Nonghikai la siat iap hakhmat ki bahaiing hasem bad ki Khun nalor kiwei ki nongsakhi ha u snem 2012” ong ki Heh Pulit.
Ka ejahar bala register ha Mendipathar Police Station ha u 2012, kala ong ba ha ka 19 tarik Naitung, 2012, ka kynhun ki riew kiengatiar ka GNLA ba don hapdeng 4-5 ngut, ba ialam da u Laben Sangma, kila leit sha ka iingsah u Dennybirth Momin (23) kaba don ha ka shnong Resu Mepan Abri bad kila siat iap ia u shabar ka Iing hajan ka lynti iaid kjat.
La iatuh ba kane ka kynhun GNLA kala shim ia ka jingim jong une u nonghikai skul tang namar ka jingsuba ba u dei u nongsyntiat ki Pulit bad ka ANVC.
Ki Pulit kila lap ioh tam ia kawei ka letter pad (envelop) jong ka GNLA bala soi da u Area Commander na ka jaka ba iap u Nonghikai skul, kaba kam ia kane ka jingpyniap. Ha kane ka letter pad la thep lang ia kawei ka shithi, lai tylli ki kuli AK bala dep siat bad ar tylli ki kuli 9 mm bala dep siat.
 ha ka sngi Thohdieng namar ka jingdonkti ban siat iap ia u nonghikai skul ha North Garo Hills District ha u snem 2012.){kind=link}