Nongpoh, Naiwieng 15: Ki Pulit ka Ri-Bhoi District hynne ka sngi ba-ar, kila ioh ban kem ia arngut ki briew kiba dei ki nongkhaii tuh ia ka ksiar na Byrnihat bad kila ioh ban kurup haduh 20 biskit ka ksiar ba 10 tola kawei, kaba shongdor palat T. 1 klur.
Ia kine ki arngut ki nongkhaii tuh ia ka ksiar la ioh ban kem da ki Pulit ka Byrnihat kiba la pynap shrip hadien ka jingioh jingtip ia ka jingwan jong kine ki briew naka thain Ladrymbai ban khaii tuh ia kane ka ksiar sha Assam.
Ia kine ki briew la ioh ban kem ha ka por 10 baje mynstep na kawei ka Mahindro Scorpio Mahindra Scorpio AS 01 EJ 6407.
Ha ka jingtohkit, kine ki arngut kila phla ba kane ka ksiar ka dei jong u Abdullah Hussain bad u Sanborlang Khaiong kiba shong ba sah ha Lad Rymbai, East Jaintia Hills District.
Ki Pulit kila lapksai ruh ba ki dang don kiwei ki briew kiba donkti lang ha kane ka kam shalan beain ia ka ksiar. Ka jingtohkit kala iaid shakhmat ban iohkem ka kine ki briew.
