Shillong, Lber 26 : Ki Pulit ka Rani Border Outpost, kila ioh kem ia arngut kiba dei ki dkhot jong ka kynhun nongtuh dieng sal, bike bad kwai ha ka jingkhynra hynne ka step sngi Ba-ar hapoh ka khlaw hajan ka shnong Ranibari.
Ki Pulit ki iathuh ba hynne ka step por 9:30 baje kila ioh jingtip ia ka jingdon ka kynhun kieng atiar kiba iaid lynti hajan ka khlaw ka shnong Ranibari bad mar mar u IC ka Rani BOP ryngkat ka kynhun jong u, kila hiar sha kane ka jaka ban pynlong ia ka jingkhynra.
Ki iathuh, katba ki Pulit kila niom sha khlaw, kane ka kynhun kala ther kuli ia ki Pulit hynrei namar ka jingdon lang ki Khynnah bad ki Kynthei, ka kynhun ki Pulit kala kiar ban ther kuli lang bad shu beh nadien nadien ia kane ka kynhun.
La iathuh ba ha ka jingkhynra, ki Pulit kila ioh bat ia arngut ki briew kiba kyrteng u Ajit Rabha bad ka Kavita Rabha, kiba la phla ba ki dei ki dkhot jong ka kynhun ba tuh dieng sal, thuk thuk bad kwai nalor kiwei kiwei.
Kine ki arngut kila phla ruh ba u nongialam jong kane ka kynhun u dei u briew uba la tip kyrteng u Rudra Rabi, uba dep u Kpanah jong u Ajit Rabha.
Ha ka jingkhynra ia ka Iingsah u Ajit Rabha, ki Pulit kila ioh kurup ia kawei ka suloi SBML ba shna hi lem bad ki makhor ba pyndonkam ban shna kuli.
Ka jingkhynra mynta ka dang iaid shakhmat hapoh ka thain ban lapdien ia baroh ki dkhot jong kane ka kynhun.
Ia kane ka case la register hapoh ka Khanapara Police Station bad ka jingtohkit mynta kala iaid shakhmat.
