Shillong, Naitung 10 : Ki shipai Border Security Force (BSF) ha ryngkat ka Ri War Development Organisation (RWDO), hynne ka sngi Nyngkong, kila ioh ban kem ia 3 ngut ki nong Bangladesh bad kurup ia 3 tylli ki wait, kiba ju wan ban pom tuh ia ki dieng ki siej, ki dieng kwai ha ki thain Tishang bad Nongjri, East Khasi Hills.
Ia kine ki nong Bangladesh la ioh kem na kawei ka jaka ba don ka liew muri kaba ksam lyngba sha u pud u sam ka shnong Tishang Nongjri.
Kane ka jingjia kala jia hadien ka jingialang kaba long hapdeng ka RWDO bad ki shipai BSF, kaba iakren halor ka jingrung tuh ki nong Bangladesh sha ki bri ka thain ban pom tuh ia ki dieng ki siej bad ki dieng kwai nalor ka jingtuh ia ki mar rep.
Kat kum ka jingiathuh ki Nongialam ka RWDO, ki nong Bangladesh ki ju wan rung tuh man ka por sha ka thain bad ki ju byrngem ruh wat ia ki nongtrei bri ban pom da ka wait lada ki pyneh bad beh ia ki na ka jingpom dieng.
Ki iathuh ba ha ka 8 tarik Naitung, ka seng kala leit iakynduh ia ki shipai BSF ban iakren halor kane ka kam hynrei dei ha ka por ba ki wan phai, kila iohi ia ki nong Bangladesh kiba mut rung tuh sha u pud ka Shnong Tishang Nongjri lyngba ka thliew murui ba don jingkieng.
Ki Nongialam ka seng kila pyntip mar mar sha ki shipai BSF kiba pahara hajan kane ka jingkieng, ban beh khtong bad kem ia kine ki nong Bangladesh.
Ki iathuh ba hynne ka sngi ha ka jingiatreilang bad ki BSF, ka seng kala ioh ban kem noh ia 3 ngut ki nong Bangla katba ki dang tuh dieng bad la ioh ruh ban kurup noh ia ki dieng nalor ki wait ba ki wah. Ia kine ki nong Bangladesh la aiti noh sha ki Pulit ba kin leh ia kaba donkam.
Ka RWDO kala phah ktien ruh sha ka Sorkar Pdeng lyngba ki shipai BSF ba ka Sorkar kan pyndep noh kham kloi ia ka jing ker sainar shah nalor ban buh ruh ia ki kot CCTV ha ki thain khappud khnang ba yn lah ban tehlakam ia ka jingwan rung tuh ki nong Bangladesh.
Pule lang ia kane: Pynbna ka Sorkar ban thung kam ia palat 1200 ngut ki nonghikai
