Shillong, Naitung 10 : Ka Sorkar Meghalaya Democratic Alliance (MDA) ba ialam da u Conrad K Sangma, kala pynbna ba kan sa pynlong ia ka recruitment drive ne ka jingthungkam ia palat 1200 ngut ki nonghikai ha kine ki arbnai ban wan.
Ia kane ka pynbna da u Myntri ka Tnad Pule Puthi Rakkam A Sangma hynne ka sngi Nyngkong uba la ong ba ka Tnad Pule Puthi kala rai ban pynlong ia ka jingthungkam ia ki kyrtong kiba la pass ia ka Meghalaya Teacher Eligibility Test (MTET).
Ula pyntip ba ka Sorkar ka lah ban pynmih ia ka jingpynbna (notification) halor kane ka kam ha ka sngi thohdieng ka 14 tarik Naitung, 2023.
U Myntri ula ban jur halor ka jingkongsan ka pule ka dangle ba janai bad pynpaw ia ka jingkut jingmut jong ka Sorkar ban pynthikna ba ki skul Lower Primary kin ioh ia ki nonghikai kat kum ka jingdonkam. Ula pyntip ba kane ka jingthungkam kan kynthup ia ka interview markhmat bad ki kyrtong bala pass ia ka MTET.
U Myntri ula kular ruh ba ka Sorkar ka kwah ban pynkloi wut wut ia kane ka kam, da ka thong ban pyndep noh ia ka jing thungkam hapoh ka arbnai.
Ula pyntip ba ka Tnad kan pyrshang ban pyndep noh ia kane ka jingthungkam hashuwa ka 15 tarik u Nailar, kaba dei ka sngi rakhe ia ka jingiohlaitluid ka Ri.
Ka jingpynbna ka ban sa mih ha ka sngi thohdieng, kan ai ia ki jingtip kiba bniah halor ka rukom pyniaid ia ka jingthungkam, kynthup ki kyndon ba lah ban ialeh kam, ka rukom applai bad ki Tarik ban leh interview.
Pule lang ia kane:Â Iakhih ka JSM hakhmat ka JHADC ba leh khyrdop khajna be-ain ka KAAC ha Khanduli
