Shillong, Nailar 04 : Ka Tnad Wildlife kala ioh ban kem ia 4 ngut ki briew bad kurup ia ki bniat hati lem bad ki snieh kyrbei ha ki artylli ki jingkhynra bala pynlong ha Ri-Bhoi District.
Ia kane ka jingkhynra la pynlong da ka Nongpoh Wildlife Range, Khasi Hills Wildlife Division, kaba la pynshong nongrim kat kum ki jingioh khubor ba thikna.
Ia ka jingkhynra la nyngkong la pynlong ha ka 18 tarik Naitung ha surok Umwang, hadien ka jingioh khubor na ka Wildlife Crime Control Bureau ia ka jingdon ka kam khaii tuh hapoh ka surok Nongpoh-Umden.
Ki nongtrei ka Wildlife kila ioh kem ia arngut ki briew bad kila ioh kurup ia 4 tylli ki bniat hati ia kaba la ngeit ba dei jong ki Hati Asiatic.
Kine ki arngut ki kyrteng u Tras Khymdeit bad u Wilshon Khymdeit ba na Ri-Bhoi. Ia kine ki arngut la register case hapoh ka Wild Life (Protection) Act, 1972 bad ka jingtohkit mynta kala iaid shakhmat.
Kawei pat ka jingkhynra kala jia ha ka 2 tarik Nailar hapoh ka shnong Shakhoikuna.
Ka kynhun kala bat ia laingut ki suba bad kurup ia artylli ki pla kiba don ia ki snieh ba suba dei jong ki Kyrbei.
Arngut ba la tip kyrteng u Benedict Khymdeit na Ri-Bhoi bad u Rupai Ingti ba na Kamrup, Assam lah kem noh da ka kynhun katba uwei ula lait ban phet. Ia kine ki mar la kurup noh hapoh ka Wildlife Act bad la register case pyrshah ia ki.
Ki Heh ka Wildlife ki pyntip ba ki hati bad ki kyrbei ki dei kiba don ha ka thup jong ki mrad kiba la ai jingiada bha hapoh India bad ka jingkhaii ia ki dkhot met jong ki, ka buh ha ka jingma ia ka jingduh jait jong ki.
