Shillong, Jylliew 24 : Ki Pulit Anti Narcotics Task Force (ANTF) kila ioh kem ia 4 ngut ki snar nongkhaii droks kynthup ia arngut ki Kynthei ha ka jingtalasi kali hynne ka sngi Nyngkong ha Khliehriar, East Jaintia Hills.
Ki Pulit ka EJH kila ioh ia ka jingtip ba thikna ba arngut ki briew lem bad kawei ka Kynthei kila wan da kawei ka kali na ka thain Silchar bad kit lang ia u droks.
Ki Pulit ANTF bala ialam da u DySP Crime Bidhan Bhattacharjee, kila pynapshrip ha Umtyra bad ioh bat ia kane ka kali bad ha ka jingtalasi ha ryngkat ka jingdon ki nongsakhi shimet, kila ioh kurup ia 15 tylli ki synduk sabon kiba don u droks heroin.
Ha ka jingtohkit, kine ki laingut ki briew kila phla ba ia une u droks la thmu ban pynpoi sha kawei ka briew kaba kyrteng ka Maya Gwala, ia kaba la ioh ban kem na Khliehriat.
Kine ki briew ba shah kem ki kyrteng u Sahin Hussain Laskar ba na Naddirgram, Cachar Assam, u Rofiqul Alom Laskar ban a Harsinghpur Nagdirgram, Cachar, ka Mamta Sinha ba na Simgiri, Chibitabicha, Cachar bad ka Maya Gwala kaba dei na Pynhorbah, Shillong.
Na kine ki briew la ioh ban kurup ia u heroin ba khia haduh 164.99 gram, lai tylli ki mobile phone bad kawei ka kali Hyundai Venue kaba don u nombor AS01-EJ-8977.
Ia kine ki nongkhaii droks la register case ha Khliehriat Police Station hapoh ka kyndon NDPS bad ka jingtohkit mynta kala iaid shakhmat.
