Nongpoh, Jylliew 23 : Kum ka jingpyrshang ban pynkylla ia u Lum Wyrtoh ha ka ‘Law Kyntang’ ka Raid Nongpoh, kum kawei na ki jaka jngohkai ba khring bha ia ki nongshangkai pyrthei ha Ri-Bhoi District, u nongtrei monsngewbha bad samla ka thain John Rymbai, ula tyrwa ban pynkylla ia ka jaka ba pynieng ia u Mot Jisu kum ka jaka duwai.
Une u Mot Jisu bala pynlong hakliar une u Lum, u dei uba la tei da ka Nongpoh Parish.
Lah ban kdew, na une u lum ba ieng u Mot, lah ruh ban iohi kyndiang ia ka sor Nongpoh baroh kawei.
U John Rymbai uba la aiti ialade ban iada bad pynneh bad iada ia ka jingitynnad ka mariang ha une u Lum Wyrtoh, ula ban jur ia ka jingdonkam ban iada ia ka khlaw bad baroh ki jingthaw ba im ha une u Lum.
Ha ka jingiakren bad Ka Shlem, ula pynpaw ba ka dei ka jingangnud bala slem bha jong u, ban pynkylla ia u Lum Wyrtoh kum ka jaka shangkai pyrthei kaba khring bha ia ki briew.
Ha baroh kine ki snem ba ula shimti ban sumar ia une u Lum, ula trei borbah ban pynitynnad ia ki jaka nalor ka jingpynkhuid bad jingthungdieng ki ban khring ia ki nongwankai.
U John Rymbai ula pan jingbit mynta na ka Nongpoh Parish bad ruh ka Raid Nongpoh ban pynkylla ia ka jaka ba ieng u Mot Jisu kum ka jaka duwai. U don ka jingngeit ba ka jingwanrah lang shijaka ia ka kam jngohkai bad ka jaka ia ki riewngeit ban wan duwai, kan iarap shikatdei eh ban kyntiew ia ka ioh ka kot hapoh ka thain.
“Ban pynkylla ia u Lum Wyrtoh sha ka jaka jngohkai bad ka jaka duwai, ka donkam ia ka jingiatreilang” ong u John haba bynrap “Da kaba leh ia kane, ngin lah ban kyntiew shisha ia ka kam jngohkai ha ka thain bad pynkylla ia ka kum kawei na ki jaka jngohkai ba khring duh ha Ri-Bhoi District”.
