Kem ka ANTF ia 2 ngut ki snar khaii droks, kurup pistol, pisa T. 2 lak bad 5 tylli ki kali

Shillong, Jylliew 16: Ki Pulit Anti Narcotics Task Force (ANTF) ka East Khasi Hills, kila ioh ban kem ia 2 ngut ki snar nongkhaii droks ka Nongbah Shillong bad ioh kurup ia bun bah u droks, kawei ka pistol shna hi, ka pisa T. 2 lak bad 5 tylli ki kali kynthup 2 tylli ki Mahindra Thar.

U Superintendent of Police ka East Khasi Hills Bah S Nongtnger u pyntip ba ia kine ki Nongkhaii droks la ioh ban kem hynnin ka miet sngi Palei bad hynne ka step sngi Thohdieng, da ka kynhun ANTF ha ryngkat ki Ophisar ka Laitumkhrah bad ka Rynjah Police Station.

U iathuh ba kane ka kynhun ki Pulit kila pynlong ia ka jingkhynra hynnin ka miet halor ka jingioh khubor ia kine ki nongkhaii droks bad kala ioh ban kem ia arngut ki snar na Nongshilliang, kaba hap hapoh ka Rynjah Police Station. Kine ki arngut ki kyrteng u Eldikinstar Sohtun bad u T James Seiminthang.

Ka kynhun kala ioh ban kurup haduh 423.09 gram u drok heroin bala thep ha ki 40 tylli ki synduk sabon na kitei ki arngut, artylli ki mobile phone, kawei ka thuk thuk ML05-R-5271, kawei ka PAN card bad ka EPIC.

Ka kynhun kala register case ia kine ki arngut hapoh ka Rynjah Police Station, halor ka kyndon 21(b)/21(c)/25/29 NDPS Act bad ka jingtohkit kala iaid shakhmat.

U Bah Nongtnger u pyntip ba hadien ka jingtohkit, ka Kynhun kala hiar khynra hynne ka sngi sngi thohdieng da ka jingialam lynti u Eldikinstar Sohtun shala ka jong ka Iingsah ha Mawpat bad ioh ban kurup ia kawei ka pistol shna hi, 7 tylli ki kuli 0.22, 6 tylli ki kuli .38 mm, uwei u kuli bala dep siat, 5 tylli ki kuli 12 bore,kawei ka air gun bad kawei ka mobile phone.

Nalor kine, kala ioh ban kurup ruh ia ka pisa ba T.2 lak bad 4 tylli ki kali kiba kynthup ia 2 tylli ki Mahindra Thar, kawei ka Maruti Zen, kawei ka Maruti 800 bad kawei ka Chevrolet Beat.

Pule lang ia kane: Syllad ka umsaw ha North Sikkim, shah taplup ka surok NH-10 ha Pegong