Nongstoiñ, Nailur 19: Ka Lampi Anchalik Border Development Committee (LABDC), kaba dei ka seng jong ki Nepali, kala kam long trai ia ki khathynriew tylli ki shnong Khasi bad Garo kiba hap hapoh ka Langpih Sector.
Kane ka seng ki Nepali kaba iadonlang bad ki Heh ka Sorkar Assam, kala phah ruh da ka jingthoh bad ka map sha u Myntri Rangbah ka Jylla Assam u Himanta Biswa Sarma, ban pynskhem ia ka hok longtrai ia kine ki shnong jong ka Langpih Sector.
Kine ki Shnong kiba ka LABDC ka kam trai ki kynthup ia ka Hahim, Kampaduli, Bangjeng, Nawapara, Dronpara, Sohmarang, Nongma kaba ki khot ka Panbaripahar, Lower Lampi, Umtap, Lawbah (Harshanagar), Umali (Umwali), Umsing (Uwahsiang), Makoibari, Mawlan kaba ki khot (Katapara), Mawsikar kaba ki khot Upper Lumpi, bad ka shnong Umbarot kaba la tip kum ka shnong Umbyrsit.
Kane ka seng kala byrngem ruh ban pynlong ia ka jingiakhih kaba jur ha Assam lada ka Sorkar Assam ka pynphai ia kine ki shnong sha ka Jylla Meghalaya.
Kane ka seng ki Nepali kala ieng skhem ruh halor ki jingtei jong ka Sorkar Assam kiba don ha kane ka thain kiba kynthup ia ka Lower Lumpi Police Border Outpost, ka Upper Lumpi Police Border Outpost, ka surok rong na Kampahduli sha Mawsikar (Upper Lumpi) bad kiwei kiwei.
Ki paidbah ka thain Langpih, kila bynniaw jur halor ka jingmih jong kane ka seng ki Nepali bad khamtam eh ia ka jingkam trai ia kine ki khathynriew tylli ki Shnong haba dawa ia ka Sorkar Jylla ba kam dei satia ban sngap ia kane ka seng bad ban iakren ruh bad ka Sorkar Assam ba kam dei ban pynlong kongsan ia ka.
