Shillong, Nailur 19 : U Bah P.T.Sawkmie, MLA barim ka Mawlai, hynne ka sngi u la pynpaw ba ka jingpynlong Ain ia ka Women Reservation Bill, kan wanrah ia ka khuid ka suba bad ka jingkylla ha ka synshar ka khaddar ha ka ri baroh kawei.
“Shimet nga pdiang sngewbha ia kane ka Bill (Women Reservation Bill) kaba pynkupbor ia ki Kynthei ka Ri. Kan plie lynti ia ki Kynthei ha ka Ri bad ha ka Jylla ba kin ioh ia ki kabu ban don bynta ha kaban thaw ia ki Policy bad ban saindur ia ki kam pynroi ha ka Ri” ula ong.
U Bah Process ula pynpaw ba ki kynthei ki la dep pyni ia ka jinglah jong ki ha kiba bun ki bynta jong ki kam pynroi bad ban leh hok ia ki kam baroh.
“Ngi khmih lynti ba kan don ka jingkylla kaba khraw ha ka ri, ha ka khyllipmat ba ki longkmie ki rung sha ka sorkar jylla bad sha ka sorkar pdeng. Shuh shuh ka bamsap kan duna bha bad ka lah ban lait syndon,” ula bynrap.
U la pynpaw ruh ba hashuwa kane bun ki kynthei kiba kwah ban long MLA, MP, hynrei kim ioh lad satia, hynrei lyngba kane ka Bill ka kabu ka la plié ia ki.
