Aizawl, Nailur 22 : Ki Khynnah skul ka Thingsulthliah Higher Secondary School, kila iamih paidbah ban iaid kjat haduh 45 kilometer ban iakynduh ia u Myntri Rangbah ka Jylla Zoramthanga, ha kaban iakren ba un kyntiew kyrdan noh ia ka skul n aka kyrdan ‘Grant-in-aid’ sha ka ‘Adhoc Grant-in- aid’.
Ha ka sngi Balang, kine ki Khynnah kila iamih nala ka Shnong ban ialeit sha Nongbah Aizawl da kaba iaid kjat bad ban leit aiti hi dalade ia ka shithi ba kyrpad ia u Myntri Rangbah ka Jylla bad u Myntri ka Pule Puthi Lalchhandama Ralte ba kin kyntiew noh noh ia ka skul.
Kine ki Khynnah kiba la iaid kjat ia palat 10 kynta ha ka shisngi tang ban ai ia ka shithi, kila ioh ia ka jingkyrshan kaba khlain na la ki jong ki para shnong, ha kaba ki dukan, ki Ophis bad ki jaka pule kila khang khyrdep naduh ka por 9 baje mynstep haduh 1 baje janmiet.
Ha ka por 3 baje janmiet jong ka sngi Balang, kine ki khynnah kila poi ha khapsor jong ka Nongbah Aizawl bad la pdiang ia ki da u President bad ki dkhot ka Mizo Students’ Union.
Hynniew ngut ki dkhot naka Students Union ka skul ha ryngkat ka Mizo Students; Union, kila iakynduh ia u Zoramthanga ha ka por 10 baje mynstep jong ka sngi Palei bad aiti ia ka shithi ba kyrpad ban kyntiew kyrdan noh ia ka skul.
U Principal ka Thingsulthliah Higher Secondary School R. Lalfakawma, ula pyntip ba kane ka jingdawa ban kyntiew kyrdan noh ia ka skul na ka Sorkar Jylla ka dei kaba la kular naduh u snem 2018.
Ula ong “Ha ka elekshon MLA 2018, ka Sorkar kala kular ban kyntiew kyrdan ia kane ka skul jong ngi n aka lump-sum grant–in- aid sha ka ad-hoc-grant-in –aid hynrei kane ka jingkular ka khlem pat treikam haduh mynta. Hynrei watla katta ngi kyrmen ba ka skul jong ngi kan sa shah kyntiew kyrdan noh shen”.
Ka Thingsulthliah Higher Secondary School mynta ka don haduh 156 ngut ki khynnah skul bad 13 ngut ki nonghikai. Ka skul ka dei kaba bun tam eh ha ka jingpynrung skul napdeng ki skul kiba don ha ki shnong ki thaw ka Mizoram. Ia kane ka skul la seng da ka Thingsulthliah Village Council ha u snem 2004.
