Shillong K’lyngkot 09: U Myntri ka pule puthi u Rakkam A Sangma hynne ka sngi Palei ula ong ba ka sorkar kala iawer ia baroh ki nongialam niam na ka bynta ban plie paidbah ia ka Captain Williamson Sangma State University ha ka 13 tarik u Kyllalyngkot ban ioh ia ka jingkyrkhu na ki.
Kane kala mih hadien ka jingkren ba dangshen ba ka sorkar jylla kan pynlong ia ka jingduwai kyrpang ki Khristan ban pynkyntang ia ka State University kaba nyngkongeh ha ka jylla ia kaba bun kila kynthoh jur pyrshah ia kane ka jingthmu ka sorkar jylla.
U Rakkam Sangma ula kyntait ia katei ka jingpynbna bad ong, “Ngam shym la ong kumtei bad ia ki kyntien bad ka senten ki dei kiba la buh hi da ki katto katne ki nongthoh khubor”.
“Hynrei hooid, ngin sa khot sngewbha ia baroh ki nongialam niam (ban plie ia ka state university) bad ngin pan ia ka jingkyrkhu kyrdoh na ki” ong u Rakkam haba iakren bad ki nongthoh khubor.
Ula ong ba kam don kano kano ka jingbakla ban pan ia ka jingkyrkhu na ka bynta katei ka jaka pule, ia ki paidbah, ia ka jylla bad ia ka ri.
“Katei kam dei ban long ka ishu hynrei ngam lah ban tip pat kumno katei kala kylla kum ka ishu. Ha ka jingialang ka ban pynlong da ka Sorkar, yn sa khot ia baroh bad iawer ruh ia ki balang bad kiwei kiwei ki nongialam niam bad ngin pan ia ka jingkyrkhu na ki. Kane kan long tang kumta hi”.
Ha kawei pat ka liang u Myntri ka pule puthi ula ong ba ka jingthaw ia katei ka state university kaba nyngkong kadei ka rai kaba heh tam kaba la shim da ka sorkar MDA hapoh ka jingialam jongu Myntri Rangbah u Conrad K Sangma.
