Jorhat, Jylliew 13: Ka Indian Air Force (IAF) ha ka sngi Saitjain ki la pynthikna ia ka jingiap jong ki 5 ngut ki shipai jong ka ha ka jingia tynrah liengsuin kit An-32 ha Jorhat ha Assam, da kaba batai ia ka jingiap jong ki kum ka jinglen lade haba don ha ka kam.
Ha ka kyrwoh ba la pynlait, ka IAF ka la pynpaw ia ka jingsngewkhia kaba khraw halor ka jingduh noh jong u Squadron Leader u Prashant Singh, u Flight Lieutenant u Shubham Kumar, u Sergeant Jitendra Sharma, u Agniveervayu Khemaram Kumawat bad u Agniveervayu Danish Alam, kiba la khlad noh ha kane ka jinghap liengsuin.
“Ka Indian Air Force ka pynpaw ka sngewsih jur halor ka jingduh noh jong ki san ngut ki shipai ha ka jingshah tynrah ka liengsuin An-32 ha Jorhat, Assam,” la ong ka kynhun shipai.
Ka IAF ka la pynpaw ïa ka jingsngewlem sha ki longïing kiba la duh noh bad ong ba ka ieng skhem bad ki ha kum kane ka por kaba eh bad kaba sngewsih.
Ka liengsuin kit shipai An-32 ka la iakynduh ia ka jingjia aksiden ha Rowriah Air Force Station kham mynshwa ha kane ka sngi. Ia ki jingtip ba bniah ha kaba iadei bad ki jingjia kiba la pynlong ia katei ka jingshah tynrah ym pat lah ban pynpaw pyrthei.
La khmih lynti ba yn sa sdang ia ka jingtohkit ban lap ia ka daw jong katei ka jingjia aksiden.
Ka An-32 ka dei liengsuiñ kit mar kaba don ar tylli ki enjin kaba long ka bynta ba kongsan jong ka liengsuiñ ka IAF bad la pyndonkam bha ïa ka na ka bynta ka jingleit jingwan jong ki shipai, ka jingkit mar bad ki kam ha ki jaka ba jngai bad ki high-altitude regions.
