Shillong, Jymmang 14 : U Myntri Rangbah ka Jylla ha ka sngi Palei, ula ong ba ka Sorkar ka dei ban tei ia ka jingiadei bad pyniajan bad ki nong shongshnong haba long ruh kaba shah skhor bad kaba lah ban leh eiei khamtam ha ka rukom synshar kba jyrwit jyrwat bad ba don ka Sorkar khleh khaw lang.
Happy to connect with the various Rangbah Shnong and community leaders of localities in the Greater Shillong Area at the CM Connect in Shillong.
The community heads of several localities raised key civic issues including water supply, drainage, street lighting, CCTV coverage,… pic.twitter.com/ipJeSUpKtq
— Conrad K Sangma (@SangmaConrad) May 14, 2026
U Conrad ula kren ia kane ha ka jingialang jong ka CM Connect – Public Consultative Meet ba la pynlong da ka Tnat Urban Affairs, ka Sorkar Meghalaya, ha ka jingïatrei lang bad ka Shillong Municipal Board, ha U Soso Tham Auditorium, Shillong.
U Symbud Myntri Rangbah ka Jylla Bah Sniawbhalang Dhar, uba khmih ïa ka Tnat Urban Affairs, u la don lang lem bad ki heh Ophisar ka sorkar, ki nongmihkhmat jong ki Dorbar Shnong ka sor, ki kynhun ba don bynta , ki barikor, bad ki nongshong shnong na kylleng ka sor Shillong.
Haba kren ha ka jingialang, u Myntri Rangbah ula ong ba kane ka CM-Connect ka dei kaba la pynwandur ba kan long tang ka rynsan ban sngap ia ki jingpynsngew.
Ha kaba ban jur ïa ka jingkitkhlieh ha ka synshar paidbah, u la ong, “Ka synshar paidbah kaba shisha ka lah ban treikam tang lada ka sorkar ka dang don ka jingiadei bad iajan bad ki nongshong shnong,” haba bynrap ba ka jingai jingmut jong ki paidbah ka dei ban ïai bteng ban ioh ia ki jingtip kiba donkam haba shim ïa ki rai. U la kdew ba ki rai jong ka sorkar ki lah ban donkam ban bishar biang kat kum ka jingai jingmut na ki paidbah, namar ka jingshakri ïa ki nongshong shnong ka long ka kamram kaba hakhmat eh jong ka synshar khadar.
Ha kaba batai ïa ka jingmih jong ka CM Connect, u Myntri Rangbah u la ong ba kane ka jingpyrshang kala mih na ka jingdonkam ïa ka jingïakynduh kaba la pynbeit ryntih ban long man ka por bad ki nongshong shnong. U la ong ba kane kala dei kum ka prokram, haba khot ïa ka “ka jingmut ba u Myntri Rangbah u dei ban dang ïai bteng ban pyniadei bad ki padibah,” lyngba ki jingïakynduh ba da pynbeit bad ki jingïakynduh hi ha kylleng ki jaka. U la pynpaw ba ka synshar khadar ka donkam ïa ka jingsngewrit bad ka jingkloi ban pynbeit, da kaba kdew ba ka jingai jingmut ka ïarap bha ban pynbha ïa ki policy bad ban kyntiew ïa ki jingmih.
Ha kaba mynjur ïa ki jingeh ha ki sor kum ka jingpynïaid ïa ka jinglum ñiut, ki surok, bad ki jingtei na ka bynta u paidbah, u la ong ba katba ka jingsngewkhia bad ka jingkynthoh jong ki paidbah ka long kaba donkam, ki lad jingpynbeit kiba tei ki long kiba donkam lang. U la kyrpad ïa ka jingïakren kaba don burom, haba kdew ba kiOphisar ki trei hapdeng ki jingeh bad ki donkam ïa ka jingïatrei lang na ka bynta ka jingpyntreikam kaba treikam.
U Myntri Rangbah u la batai ïa ka rukom treikam jong ka CM Connect, da kaba ong ba ka long ka rukom kaba bun kyrdan kaba kyrshan da ka rynsan ban pdiang ia ki jingud jingnam u paidbah kaba la pynïasoh bad ka call centre 1971. U la ong ba ïa ki jingujor la buh thoh, la bynshet sha ki tnat, la peit bniah lyngba ki dashboard, bad la nang pynheh ia ka kam lada slem. U la bynrap ba ka CM-Connect ka don ruh ia ka emergency response tool haba mih ki khep kiba donkan kyrkieh ban leh eiei.
U la ong shuh shuh ba ïa kane ka model yn nang pynkhlaiñ da kaba pynïasoh bad kiwei ki rukom treikam kiba iasyriem kum ka MLA Connect bad DC Connect, ban pyntikna ïa ka jingïakynduh bad ki nongshong shnong kaba don rukom bad kaba ïai bteng ha man ki jaka. U la iathuh ruh ba ïa ka CM Connect la rah ban pyni ha ki rynsan jingialang ka ri bad ka la ïoh ïa ka jingithuh kum ka jingpyrshang kaba thymmai ha ka synshar khadar.
Ha kaba pynkut ïa ka jingkren , u Myntri Rangbah u la ong, “Ngim lah ban pynbeit ïa baroh ki jingeh tang ha ka shi miet. Hynrei lada ngi dang long kiba don ia ka jingmut kaba bha, kiba tei, bad kiba pyrshang ban wad ïa ki lad ki lynti, ngin lah ban ïaid shaphrang da kaba suk bad kaba don jingmut,” haba bynrap ba ka jingmut kaba tei ka long kaba donkam na ka bynta ka synshar khadar kaba treikam bha.
U Symbud Myntri Rangbah Sniawbhalang Dhar u la ong ba ka jingjop jong ka CM Connect ka pyni ïa ka jingïashim bynta kaba khlaiñ na ki nongshong shnong, khamtam ki samla, bad ka jingïatrei lang kaba jan hapdeng ki tnat sorkar, ki Dorbar Shnong bad ki nongïalam shnong.
U la ban jur ba ka synshar khadar ka dei ban buh hakhmat eh ïa ki padibah, haba pynpaw ba kan ymlong kaba treikam bha lada shu kut tang hapoh ki ophis, bad ka dei ban poi sha ki paidbah ban sngewthuh bad ban jubab ïa ki jingdonkam jong ki. U la pynskhem biang ïa ka jingkut jingmut jong ka sorkar ha ka roi ka par kaba kynthup lang ïa baroh ha ki jingtei sor, ka kam jngohkai, bad kiwei ki bynta, da kaba kdew ba ïa ki kam baroh ynsa ïohi hadien.
Ha kane ka prokram, U Myntri Rangbah ula pyllait ia ka Chief Minister’s Artist Engagement Scheme. Kane ka skhim ka thmu ban kyntiew ïa ka jingpynpaw nam ïa ka kolshor lyngba ki jingthoh dur dakaba pyndonkam ia ki barikor na Jylla ba kin shna ia ki murals bad ki jingthohdur ha ki kynroh surok ha kylleng ka Jylla. La sam ruh ia ka cheque ban pynkhreh ia kane ka kam ba long mar T.20,000 sha ki barikor kiba la jied.
Ka Shillong Municipal Board kala wanrah ruh ia ka prokram ban ai kyrdan ia ki Shnong ki thaw ha ryngkat ka jingiatreilang bad ka PM Upliftment of Urban Bodies Programme. Kane ka jingai kyrdan ka dei kaba pynshong nonrim na ka jingkhuid jingsuba, ka rukom pyniaid ia ki niut ki jaboh bad ki rukom leh ban pynitynnad ia ka mariang.
Ïa ki shnong kiba leh bha tam la ai jingithuh da ki khusnam song pisa, kynthup T.12 lak na ka bynta kiba wan ha kyrdan ba hakhlieh duh, bud da T.10 lak, T.8 lak, bad kiwei ki khusnam kat kum ka jingïleh bha jong ki.
Ki mat kiba la mih ha ka jingiakren bad ki paidbah ki kynthup ia ka jingsam umbam umdih, ki naka, ki strret light, ka jingpyndait kor CCTV, ka jingpynbha ia ki surok, ka jingthut ka bor ding ha kaba ki Ophisar na ka tnad PHE, PWD, Power bad Urban Affairs kila ai jubab ia k jingkylli bad batai ia ki kam ba ki dang iaid kum ka jingpyntreikam ia ka RDSS, ka jingkyntiew kyrdan ia ki Transformer bad kiwei kiwei.
