Shillong, Jymmang 14 : Ka Election Commission ka ri India kala bthah ban leh ia ka Special Intensive Revision jong ka Electoral Roll ha ki 16 tylli ki Jylla, kynthup ka Meghalaya kum shibynta jong ka SIR Phase-III bala pynlong hapoh ka ri baroh kawei.
Ia ka sngi ba ka Meghalaya ha ryngkat ka Karnataka, Maharashtra, Jharkhand bad Delhi, kin pynshisha ia ki nongthep vote kiba dei hok lane ban pynrung kyrteng, kan long ha ka 1 tarik Risaw, 2026.
Kat kum ka por bala pynmih da ka ECI, ka jingpynkhreh ia ki jingai jinghikai bad jingshon yn sa leh naduh ka 20 tarik haduh 29 tarik Jylliew. Ki Booth Level Officers kin leit rung ha man ki thliew iing naduh ka 30 tarik Jylliew haduh ka 29 tarik Naitung.
Ïa ka jingpynbeit ryntih ïa ki polling station dei ban pyndep hapoh ka 29 tarik Naitung. Ïa ki draft electoral roll yn pynmih ha ka 5 tarik Nailar.
Ka por ban thep ïa ki jingkam bad ki jingpyrshah kan ïaid naduh 5 Nailar haduh 9 Nailur, katba ka por pynmih jingpynbna bad ka jingpynbeit ïa ki jingkam kan ïai bteng haduh ka 3 Risaw.
Ia ka electoral roll ba khatduh lah buh ban pynmih ha ka 7 tarik Risaw.
Kat haduh ka 12 tarik Jymmang, 2026, ka Meghalaya ka don haduh 23,43,252 ngut ki nongthep vote. Ka Jylla ka don haduh 3551 ki Booth Level Officer kiba la thung ban leh ia kane ka kam. Ym shym don uwei ruh u Booth Level Agent ban shah thung ha kane ka kam haduh mynta.
Da kane ka hukum, ka Special Intensive Revision kan iaid ha baroh kawei ka Ri ha ka Phase-III lait noh ka Himachal Pradesh, Jammu & Kashmir bad Ladakh.
Ha kane ka SIR Phase-III, palat 3.94 lak ngut ki Booth Level Officer kin leit rung man ki thliew Iing ban lum jingtip na ki 36.73 klur ki nongthep vote kiba don ha ki 16 tylli ki Jylla bad lai tylli ki Union Territories. Yn iarap ia ki da ki 3.42 lak ki Booth Level Agent bala thung da ki seng sain pyrthei ha ka jingpynrung kyrteng.
