Shillong Lber 03: Ka Standing Conference of Public Enterprises (SCOPE), ka kynhun ba halor tam jong ki Public Sector Enterprise (PSE) kala pynlong ia ka ‘National Meet on Right To Information (RTI) Act’ ha nongbah Shillong.
Ha kane ka jingialang, la ai jingkren da u Heeralal Samariya u Chief Information Commissioner, CIC, u Bah H. Nongpluh u State Chief Information Commissioner ka Meghalaya, u Atul Sobti uba long u Director General ka SCOPE bad ki ophisar jong ka Sorkar Pdeng bad Sorkar Jylla.
Ha kane ka jingialang, la wan iashim bynta da palat 80 ngut ki dkhot na34 tylli ki PSE.
U Heeralal Samariya ula ong, ba ka jingthmu jong ka Right to Information Act ka dei ban wanrah ia ka jingshai bad ka jingbahkhlieh ha ka jingsynshar bad watla ka RTI ka dei ka Aiñ kaba rit, hynrei kadei pat ka Aiñ kaba donbor tam.
Ula ai jingmut ia ki ophisar ba kin plie lad ia ka jingai jingtip ia ki paidbah namar kane ka dei ka hok jong ki bad ruh ba kin ai ia ki jingtip kiba biang bha ia ki paidbah.
Katba u Bah H. Nongpluh ula ong, ba ka RTI kadei kawei na ki Aiñ kaba pynkup bor tam bad ka rukom pyrkhat jong u Public Information Officer (PIO) ka long kaba kongsan bad ruh ba kidei ban trei mardor ban ai jubab ia kiba pan jingtip lyngba ka RTI.
Ula ong, ba dei ban pynlong shuh shuh ia kum kine ki prokram khnang ban ai jingtip shaphang kane ka Aiñ ia ki paidbah.
U Atul Sobti ula ong, ba ka RTI ka dei ka Aiñ kaba kyrpang, kaba donkam bad kaba pynkupbor tam bad ka SCOPE ka don ia jingthmu ban pynlong ia kane ka jingialang ha baroh ki thaiñ khnang ba kan plie lad shuh shuh ha kaban ai iaka jingshai, jingtip bad ban ioh iakren halor ki bynta bapher jong ka RTI.
