Shillong, Jymmang 07 : Ka Harijan Panchayat Committee (HPC) bad ka Delhi Sikh Gurudwara Management Committee (DSGMC), ha ka sngi Ba-ar, kila niew ia ka jubab RTI ka Shillong Municipal Board (SMB), ba ong ba 148 tylli ki Iing na ki 342 tylli ki dei kiba sah beain ha Them Metor, ka dei ka bym shisha satia.
Ka SMB ha ka jubab ia ka RTI bala pan da ka seng Hynniewtrep Youth Council hapoh ka RTI Act , 2005, kala iathuh ba ki don tang 194 tylli ki Longiing, kiba trei hapoh ka SMB bad kiwei ki Ophis Sorkar.
Haba iakren bad ki nongthoh khubor hadien ka jingialang bad ka Sorkar ba iakren halor ka jingpynkynriah noh ia ki 342 tylli ki Longiing na Them Metor, u General Secretary ka DSGMC Jagdeep Singh ula ong ba kam don satia ka jingshisha halor ka jubab RTI jong ka SMB.
“Kam dei satia kaba shisha. Kam dei kaba dei. Kala dep survey ha u 2007 ha kaba ka HPC bad ka Sorkar kila mynjur ia ka jingdon ki longiing kiba sah ha katei ka jaka” ula ong.
Kumjuh ruh u Secretary ka HPC Gurjit Singh ula ong ba ka colony ha Them Metor, Them Iew Mawlong kam dei satia tang jong ki Nongtrei Sorkar hynrei jong ki briew, kiba la sah ha katei ka jaka naduh 200 snem mynshuwa.
“Ngi wan hangne mynta ka sngi ban pynthikna ba ka jingai jaka sah kan long ia ki 342 tylli ki Longiing” ula bynrap.
Kane ka jingkynthoh jong u kala mih hadien ba ka HYC kala dawa ban kyndang ia ki nongshong beain ha katei ka jaka. Namar kata, ka Sorkar kala bthah ia ka Tnad Urban Affairs bad ka SMB ba kan pynshai ia kane ka kam hadien ka jingpynthikna ia ka jubab RTI.
U Jagdeep Singh ula pyntip ba ka jingialang bala pynlong bad ka Sorkar hynne ka sngi ka long kaba seisoh bha haba bynrap ba ka kynhun ka kyrmen ba ia kane ka kam yn sa lah ban pynbeitnoh ha ka sien shong jingialang ban wan, ka ban long ha ka taiew ba nyngkong u bnai Jylliew.
Haba kylli ia ka jingdawa ban nang pynheh ia ka lyngkhot jaka ban shna iing kumba kyrpad da ki briew ba sah ha Them Metor, u General Secretary ka DSGMC ula ong “Ka jingdawa ka dang don. Ngi la iakren halor kane ka mat hynrei ngim pat shim rai satia hynrei hooid ka kam kala iaid shakhmat, nga mut ong ba ngin sa shim rai khatduh ha ka jingialang ka ban long ha ka taiew ba nyngkong u Jylliew”.
Ula iathuh ba ki don katto katne ki mat bala iakren ha kane ka jingialang bad ka kynhun kala pan por ia ka Sorkar ba kan ioh iakren ia kine ki mat bad ki nongshongshnong ka thain.
“Ngin leit phai mynta bad bgin iakren bad ki briew jong ngi bad ngin sa khmih ia kaei kaba lah ban leh naba ngi ruh ngi kwah ban iapynbeit noh da ka jingiasngewthuh jingmut lang..ngi kyrmen ban gin poi sha kaba kut” ong u Jagdeep.
 bad ka Delhi Sikh Gurudwara Management Committee (DSGMC), ha ka sngi Ba-ar, kila niew ia ka jubab RTI ka Shillong Municipal Board (SMB), ba ong ba 148 tylli ki Iing na ki 342 tylli ki dei kiba sah beain ha Them Metor, ka dei ka bym shisha satia.){kind=link}