Shilllong, Jylliew 04 : U Bah P.T.Sawkmie, MLA barim ka Mawlai, u la ong ba ka jingthmu jong ki bor pyniaid district ban pynduna ia ka jingdheng kali ha nongbah Shillong da kaba pyntreikam ia ka odd bad even number jong ki taksi kamai ha Shillong, kan dei kaba ktah jur bha ia ka kamai ka kajih jong ki nongniah taksi.
Une u MLA barim ula kyntu ia ki bor pyniaid District ba ki donkam ban khmih biang sa shisien ia kane ka hukum halor ka nongrim ba kane ka jingthmu kan ktah jur ia ki longiing longsem jong ki nongniah taksi kamai.
“Nga kynmaw ha ka por jong ka khlam COVID-19 ka sorkar kam shym la pyntreikam ia ka odd bad even number na ka bynta ki kali kamai,” ong u bah Sawkmie haba kren sha u nongthoh khubor.
U ong ruh, “Kino kino ki policy ba wanrah da ka sorkar ki dei ban long ki policy na ka bynta ki paidbah, ngi dei ban pyrshang ban kiar na ki policy kiba ktah ia ki duk ki suk.”
U la pynpaw shuh shuh ba ki khajna ki rem bha na ka bynta ki kali kamai bad ki bor ba dei khmih ki dain sa ka kuna ia kito ki kali kamai ki bym lah ban siew ia ka khajna ha ka por ba dei biang.
“Namar kata ngi dei ban pyrkhat bha halor ka jingeh ba mad da kine ki nongniah kali kamai,” bynrap u bah Sawkmie.
