SHILLONG, Iaiong 02: U Nongaiktien ka Seng Saiñ Pyrthei ka National People’s Party (NPP) u Bah Himalaya M Shangpliang hynne ka Sngi Baar ula ong ba ka NPP bad ka BJP kim dei satia kijuh bad dei lyngba ki nongialam ka NPP ba ka Jylla Meghalaya kala lait na ka jingpyntreikam ia ka Citizenship Amendment Act (CAA).
Haba iakren bad ki nongthoh khubor u Bah Shangpliang ula pynshai ia ki jingkynnoh jong ki seng saiñ pyrthei ba kam don kano kano kaba thymami ba ka BJP bad ka NPP ki iatreilang ha ka National Democratic Alliance (NDA).
“Mynta haba la thaw iaka NDA, ka NPP kala dep ban don lypa ha katei ka kynhun bad ka BJP ha ka sorkarpdeng bad phi lah ruh ban sakhi ia katei ka juh hi ha ka Sorkar MDA-1, Ngi la ioh ia ka jingkyrshan na ka BJP, UDP bad kiwei kiwei ha kaban thaw ia ka sorkar bad kumjuh ha ka sorkar MDA-2 ruh, ka BJP kadei kaba donlang ha ka sorkar jylla” ula ong.
Ula ong, ba ka NPP ka sngewburom ia ka jingrai ka BJP ban ai jingkyrshan ia ka NPP ha ka elekshon MP Lok Sabha hapoh ka jylla Meghalaya.
“Kumta haba ka BJP kam shym la pyniengkyrtong ha ka elekhson MP election, Nga hap ban ong, ngi sngew burom ia ka rai kaba la shim da ki nongialam kiba ha khlieh jongka BJP seng kmie, kaba la shim ia katei ka rai ban burom ia ka jingiatreilang kum ka kynhun ban plie lad ia ka Kong Ampareen Lyngdoh ban jop suk ia ka elekshon, hynrei haba nga ong kumtei, kila don ki khep pat kiba ka NPP kala rah ia ki mat kiba iadei bad ka CAA, ILP bad kam long kaba iahap ban ong ba ka BJP bad ka NPP kidei kijuh” la ong u Bah Shangpliang.
“Ka NPP ka ieng naka bynta ki paidbah ka jylla. Ki don ki ishu kiba iadei bad ka jylla kaba ka NPP ka ieng. Ngi iakhun na ka bynta ban pynioh ia ka jingiathuh ia ka ktien Khasi bad Garo hapoh jongka Eighth Schedule bad ngin iai bteng halor kane ka kam” ula ong.
“Ngi dang ia bauddien halor ka Resolution kaba la mynjur da ka ing dorbar thawain ka jylla ha kaba iadei bad ka ILP bad kadei lyngba ka jingstad jong ki nongialam ka NPP ba ia ka CAA ym shim la pyntreikam pura ha ka jylla Meghalaya. Ngi burom ia ka jingiatreilang bad ka BJP bad ngi ia burom mar kylliang bad ngi khmih lynti ba ngin ia iaid lang bad kane ka kynhun iatreilang ha kine ki sngi ban wanrah ia ki kam pynroi bad ia ka bha ka miat haka jylla” ula ong.
“Ngi la iatai sani halor ka CAA hapoh bad shabar jong ka seng bad ha ka ing dorbar bad wat shabar jong ka iing dorbar thawain bad kadei ka rai kaba la shim na ka jingsngew jong ki paidbah ka jylla ia kaba ka sorkar kala pynsngew sha ka sorkar pdeng bad kumta na ka liang ka sorkar pdeng kala sngap bad la pyllait na ka jingpyntreikam haka jylla” la pynkut u Nongaiktien ka NPP.
