Shillong, Nailar 29 : U Symbud Myntri Rangbah ka Jylla uba dei ruh u Regional Committee ka Jaintia Hills, Bah Sniawbhalang Dhar ula pyntip ba ka shnong Lapangap ha West Jaintia Hills, ka dei ka Shnong ka bym hap satia hapoh ka jaka ba iakajia pud kiba ka Sorkar Meghalaya bad Assam ki iakren ban pynbeit noh.
Haba iakren bad ki nongthoh khubor hynne ka sngi Thohdieng, u Bah Sniawbha ula pyntip ba ka Sorkar Jylla kala phah shuh shuh ia ki bor Pulit ban ai jingiada ia ka thain Lapangap, kaba don hapdeng ka jingiakynad hapdeng ki paid Khasi-Pnar bad ki Karbi la katto katne sngi.
Lah ban kdew ba ki paid Khasi-Pnar bad ki Karbi kila ialeh thma siat jri bad khnam ryntieh haduh laisngi lynter naduh ka sngi Ba-ar halor ka jingiakam trai ia ka jaka ha Lapangap.
Hynnin ka sngi, ki Deputy Commissioner ka West Jaintia Hills bad West Karbi Anglong District kila iashong jingialang ba kyrkieh ban tem noh ia kane ka jingiakynad.
Haba kren halor kane ka jingialang, u Symbud Myntri Rangbah ula ong ba ka Sorkar Jylla ka dang ap mynta ia ka kaiphod na u DC ka West Jaintia Hills, ia kaba u Myntri Rangbah ka Jylla Conrad K Sangma un sa rah iakren bad u Myntri Rangbah ka Assam ha ka jingialang ka ban long lashai ka sngi Saitjain ha Guwahati.
U Symbud Myntri Rangbah u pyntip ba ia mynta kam shym la don shuh ka jingiakynad ha Lapangap bad ki bor District kila peit pyrman bha ia ka jinglong jingman ha ka thain.
