Shillong, Nailur 29: U myntri ka tnat DoNER ka sorkar pdeng u G. Kishan Reddy hynne ka sngi ula pyllait paidbah iaka 5G Applications ha 7 tylli ki jylla ka thain shathei lammihngi kynthup ka Meghalaya bad lait noh ka Arunachal Pradesh, haka jingialang bala long hapoh ka Tech City, Bongora Guwahati ka jylla Assam.
Ki Myntri sorkar ba don lang ha kane ka sngi ki kynthup u Myntri rangbah ka jylla Arunachal Pradesh u Pema Khandu, u Myntri Rangbah ka Sikkim u Alo Libang, ka Myntri ka tnat ka koit ka khiah Meghalaya kong Ampareen Lynndoh, u Myntri ka tnat ka koit ka khiah ka Arunachal Pradesh u Lorho Foze, u MP Ritu Barman Sarmah, u Vice Chairman ka AMPRTON u Syeddin Abbasi, u Additional Chief Secretary ka tnat Telecom ka sorkar India u Rajaraman.
Ia kane ka 5G Applications la pynwan dur daka AMTRON haka jingiatreilang bad ka tnat DoNER, ka tnat Telecommunications ka sorkar India, ka Telecom Sector Skill Council, School of Planning & Architecture, New Delhi, ka Vardhaman Mahavir Medical College & Safdarjung Hospital New Delhi, ka Design Innovation Center, UIET, Punjab University, ka ALIMCO jong ka tnat Ministry of Social Justice & Development, Government of India.
Lah ban kdew ba haka 22 tarik Nohprah 2022 u Myntri Rangbah duh ka ri u Narendra Modi lyngba ka juk Online ula pyllait paidbah ia ka 5G application haka jingrakhe Golden Jubilee jong ka North Eastern Council kum ka jingthmu ban kyntiew iaka ioh kam ioh jam ki samla ka ri bad ban kyntiew iaka ioh ha baroh kawei ka thain.
Haba kren ha kane ka sngi u G. Kishan Reddy ula ong ba kane ka jingpyllait iaka 5G Applications ha 7 tylli ki jylla ka thain shathei lammihngi ka dei namar ka jingiohi jngai u Myntri Rangbahduh Narendra Modi ban kyntiew iaka Digital Economy jong ka ri.
U G Kishan Reddy ula ong ba kane ka 5G Application kan nang ialam iaka ri shakhmat eh haba iadei bad ka jingpynrung iaki Aadhar, United Payments Interface (UPI) bad Digilocker naka bynta ban kyntiew iaka ioh ka kot haka juh kaba mynta lyngba ka juk Online.
Ula iathuh baka NEC kala bei 100% naka bynta ban ai jinghikai pyntbit iaki samla haba iadei bad ka 5G Training Labs bad 5G Health Use Case applications ha baroh 8 tylli ki jylla ka thain shathei lam mihngi.
