Shillong, Naiwieng 04 : Ha ka jingwanrah ia ka jingkylla ha ka sain hima sima, ki Nongialam ba pawkhmat na kylleng ki Jylla ka thain Shatei Lam Mihngi ka India, kila iasnohkti lang ban pynbna ia ka jingpynkha ia kawei ka rynsan iatreilang ki seng riewlum hapoh ka lama “One North East”.
Kane ka sienjam ka dei kaba la shim ban wanrah lang ha kawei ka rynsan ia ki sur bapher bapher jong ka thain hapoh kawei ka seng sainpyrthei ka ban lah mihkhmat shisha kat kum ka jingangnud jong ki paidbah jong ka.
Ia kane la pynbna ha New Delhi lyngba ka kyrwoh ba la iasoi lang da u Conrad K Sangma, Myntri Rangbah ka Meghalaya bad National President ka National People’s Party (NPP), u Pradyot Bikram Manikya, Nongseng ka TIPRA Motha Party, u Mmhonlumo Kikon, Nongaiktien barim ka BJP bad Myntri Sorkar na Nagaland bad u Daniel Langthasa, Nongseng jong ka People’s Party, Assam.
“Lah slem bha, ngi, ki nongialam kane ka juk mynta jong ka thain Shatei Lam Mihngi, ngi la kren ia kijuh ki mat bad jingsngewkhia jong ki briew jong ngi na ki rynsan bapher bapher. Ngi la shemphang b aka bor jong ngi ka shong eh ha ka jingiatylli, bad ka por kala dei ban ai sha ki briew jong ngi ia kawei ka sur jong baroh lang” ong kine ki nongialam ha ka kyrwoh.
Kila bynrap ba kane ka kynhun thymmai kan shim ia ka jingai mynsiem na ki jingiohi jngai bad ka nam jong ki Nongialam ka thain kiba la leit noh, kiba la iakhun na ka bynta ka jingithuh kyrpang bad ka roi ka par jong ka thain Shatei Lam Mihngi.
Kum ka sienjam ba hap leh kyrkieh, yn sa thaw ia ka Committee ka ban shong pyrkhat bad iakren halor ki kam kiba dei ban leh, kynthup ki rukom treikam bad ka rukom long jong kane ka seng sain pyrthei ba tyrwa ban thaw.
“Ka jingpyrshang iatylli jong ngi ka dei kaba la ialam lynti da kawei ka jingngeit – ba ki briew jong ka thain Shatei Lam Mihngi ki dei hok ban ioh ia ka jingshah skhor, burom bad mihkhmat lyngba ka sur sain pyrthei kaba khlain, kaba iatylli ha ka ri” ong ka kyrwoh.
“Ngi la rai ban iatreilang ha ka ban pynkha ia ka seng sain pyrthei ba kyrpang na ka bynta ka thain Shatei Lam Mihngi. Ngi la thaw ia ka Committee bad kan sa aiti ia ka kaiphod hapoh kine ki 45 sngi ban wan. Ngi wan hangne ym ban iakhun pyrshah ia kiwei ki seng sain pyrthei- ka jingpynleit jingmut ba hakhmat eh jong ngi ka long ia ki briew ka thain Shatei Lam Mihngi. Ka jingthmu ka long ban ai ia kawei ka rynsan na ka bynta jong ki” ong u Conrad Sangma haba kren sha ki lad pathai khubor.
Ka jingthaw ia ka “One North East” la shim kum ka sienjam kaba kongsan ban sei ia ki nongialam na ka thain bad ban wanrah ia ka sur kaba khlain ha ka sain hima sima na ka bynta ki phra tylli ki Jylla ka thain Shatei Lam Mihngi ha ki rynsan jong ka Ri.
