Shillong, Kyllalyngkot 10: Ka National People’s Party (NPP) kala jied iaka kyrtong kaba kynsai tam na ka Shillong Parliamentary Constituency, pynpaw u Myntri ka Sorkar bad Nongialam ka NPP Rakkam A Sangma haba kynthoh “Ka Kong Ampareen bad ka Jainsem ha Parliament, katno kan long ka jingsarong ia ka Shillong constituency”.
Haba iakren bad ki nongthoh khubor, u Rakkam ula pynskhem ba ka NPP kala jied da ka kyrtong kaba kynsai tam bad ka kynthei kaba biang tam naka bynta ka elekshon bad ula banjur ia ki paidbah ba kidei ban nang ban pynshong nongrim iano kin phah sha Delhi.
Ula banjur iaka jinglong kyrpang jong ka Meghalaya ha kaba iadei bad ka jingai jait sha ka kmie bad ka long kaba kongsan ban jied ia ka kmie ban mihkhmat iaka Shillong Parliamentary Constituency sha Delhi.
U Rakkam ula ong, ba ka por kala biang bha ban phah daka MP kynthei sha ka Parliament, khamtam haba la bhah 33 percent ia ki seat na ka bynta ki kynthei lyngba ka Women Reservation Act.
Ula pynpaw iaka jingskhem jingmut ba ka Kong Ampareen kan jop ia ka elekshon bad ym iohi ba kan don kano kano ka daw ba ka NPP kan ym jop na Shillong bad Tura seat.
U Myntri Sorkar ula ong, ba ka Dr. Ampareen kadei kaba biang tam bad ki nongshong shnong ka Shillong kin sngew sarong ban sakhi ba ka Dr. Ampareen kan phong da ka jaiñsem hapoh jong ka Parliament.
“Ki paidbah ka Shillong kin sa sngewsarong ban iohi ba ka Dr. Ampareen kankren hapoh Parliament ha kaba kan riam da ki riam tynrai” ula pynkut.
