Shillong, K’lyngkot 11 : Ka South West Khasi Hills District, kala ioh ban khur ia ka point ba nyngkong eh ha ka jingialehkai phutbol jong ka lympung Meghalaya Games 2024, da ka jinglah ban pynliem ia ka South Garo Hills.
Ka jingialehkai U-18 ki shynrang hapdeng ka South West Khasi Hills bad South Garo Hills District ka dei kaba ot ribbon ia ka lympung Meghalaya Games 2024. Ia kane ka jingiakhun la pynlong ha madan Govt Boy’s Higher School Playground, Chandmari, Tura.
Naduh ba sdang ka jingiakhun jong ka kylla step, ka kynhun ialehkai ka South West Khasi Hills kala pyni ia ka sap jingtbit bad kala lah ban thep 2 kol ban tam shakhmat ia ka jingiakhun.
Ka South Garo Hills ruh kala pyni ia ka jingtbit bad kala iakhun dohiap ban ioh pynkhih jar haduh da ioh ban pynphai ia shi kol ha ka kylla step.
Haba wanphai sha ka kylla miet, ka kynhun ka South West Khasi Hills kala ioh ban thep biang sa 4 kol bad khlem ailad ban shah thep kylla haduh ba kala tam da 6-1 kol.
Ka kynhun South West Khasi Hills kala jam mynta sha kawei pat ka round.
