Shillong, K’Lyngkot 10: Ka tnat Pule Puthi ka Sorkar Jylla ka dang ap naka tnat Ministry of Education ka Sorkar Pdeng ban pyllait iaka pisa naka bynta ka bai bam Scholarship jong ki 67,000 ngut ki samla pule.
Ka Meghalaya ka donkam kumba T.63 klur ban siew bai bam lane Scholarship sha ki samla pule ka Jylla bad haduh mynta ka Sorkar Jylla kala dep ban pyllait T.34 klur.
U Myntri ka tnat Pule Puthi ka Sorkar Jylla u Rakkam Sangma ula iathuh ba ka tnat kala dep ban phah lut iaki jingdonkam kum ki Utilization Certificate (UC) shaka Ministry of Education ka Sorkar Pdeng.
“Ka tnat Ministry of Education ka Sorkar Pdeng kala pan iaki UCs, ha kaba ka tnat kala dep ban phah. Ka jingslem kadei hi namar ka Ministry ka kwah iaki kot ki sla kum ki UCs bad kala bthah ban pyndonkam shwa iaka pisa katba don ha kaba ka Sorkar Jylla kala dep ban pyndonkam ka pisa jong ka First Installment” la ong u Rakkam.
Haba iadei bad ki nonghikai ki bym ju leit sha ki Skul (Proxy Teachers), ka Sorkar Jylla kala buh ka jingmaham ban leh tyngeh, lada lap kum ia kita ki nonghikai.
Haba ia ka jingmaham, u Myntri ka tnat Pule Puthi ka Sorkar Jylla u Rakkam Sangma ula pyntip ba ki don ki nonghikai ki bym ju leit sha ki skul bad naka liang ka tnat kan wad bniah ia kum kita ki nonghikai bad lada lap kan leh daka ba tyngeh.
Haba pynpaw ba don ki nonghikai ki bym kwah shuh ban hikai, u Rakkam ula ong “Nga kyntu ia kum kita ki nonghikai ba kin shim noh daka Voluntary Retirements Scheme (VRS) bad kin trei noh da kano kano ka kam kaba ki sngewtynnad”.
U Rakkam ula kyntu iaki Nonghikai ba kidei ban shim ka jingkitkhlieh ban ai ka jingshakri ban kyntiew iaka pule puthi hapoh ka Jylla.
