Shillong, Risaw 23 : Ka Sorkar Jylla kala pynjynsur ia ka rta iohkam jong ki Nonghikai SSA ka Jylla ba kin lah ha ka ban iakhun ia ki eksam thungkam Nonghikai ha ki skul Sorkar.
Ka Sorkar kala shim ia kane ka rai ha ka jingialang jong ka Kynhun Myntri ba long hynne ka sngi Balang ha Resubelpara, North Garo Hills District.
U Myntri ka Tnad Pule Puthi Rakkam A Sangma, u pyntip ba ka Sorkar kala plie lad ia ki Nonghikai SSA ba kin iakhun ia ki eksam thungkam nonghikai ha ki skul Sorkar da kaba pynjlan ia ka rta iohkam jong ki.
U pyntip ba ka Kynhun Myntri kala pynkiew ia ka rta iohkam ia ki Nonghikai SSA sha ka 45 snem, kaba mut ba ki nonghikai SSA kin lah ban iakhun ia ki eksam thungkam bala pynbna da ka Sorkar ha ki skul Lower Primary, Upper Primary, Secondary bad Higher Secondary.
Lah ban kdew hangne, kane ka rai jong ka Sorkar kala wan jia ruh ha ka por ba ki Nonghikai SSA ka Jylla, kila dawa ia ka Sorkar Jylla ban pynkiew tulop bad ban shimti noh ia ka jingshakri jong ki da ka Tnad Pule Puthi ka Jylla.
