Nongpoh, Nailar 29: U nongmihkhmat ka Nongpoh Bah Mayralborn Syiem ula ban jur ba ka Jylla kala donkam ban don noh iala ka jong ka University ym shuh ban shaniah tang ha ka North Eastern Hills University (NEHU).
Une u MLA ba shah sospon ka Congress ula pynpaw ia kane haba kren ha ka jingialang pynkup burom ia ki samla pule ka Ri Bhoi College kiba la pyndep ia ka sixth semester, lane kata ka graduation ha ka lain Arts bad Commerce ba long hynne ka sngi.
“Kumba long mynta, ka jylla ka don tang ka North Eastern Hill University (NEHU) bad kane ruh kadei hapoh ka jingkhmih jong ka sorkar kmie bad bunsien ki ju mih ki jinghuri hura bad ki jingbym iahap jingmut hapoh kane ka skul bah, namar la pyniaid da ki bor na ka nongbah Delhi” ula ong.
“Ka por kala dei ba ka jylla Meghalaya kan don noh iala ka jong ka skulbah kaban long ka jingmyntoi ia ka jaidbynriew, ia ki khun samla bad ruh ban kyntiew shuh shuh khambha ia ka pule puthi hapoh ka jylla” ula bynrap.
Ha kajuh ka por, une u MLA ula kren ia ka jingdonkam ka jingiatylli jong baroh ki paidbah bad khamtam ki nongmihkhmat kiba don ha ka ka bor ban pynurlong kam ia kane ka jingphohsniew kaba baroh ki paidbah ki angnud bad khmih lynti.
Ha kawei de ka bynta, u la ong ruh ba u don ia ka thong ban wanrah ia ka Medical College ha Ri Bhoi bad haba kren ia kane, bunsien ki don kiba ong kumba pyrta ha khlaw, hynrei wat la katta ruh kumba ka district ka la shah jied ban long kum kata ka Aspirational District, un iai pyrshang bad lyngba ka jingai jingkyrshan jong ki paidbah bad ka jingiatreilang ryngkat ryngkat, kane ruh lehse kan sa urlong shisien ka sngi.
